ეშლი იანგი დარწმუნებულია, რომ "მანჩესტერ იუნაიტედს" ძვირი შეცდომა არ დაუშვია, როცა პრემიერ ლიგის სარეკორდო ტრანსფერი განახორციელა და ანხელ დი მარია შეიძინა.
ჩემპიონთა ლიგის მოგების შემდეგ დი მარიამ მადრიდის "რეალი" დატოვა და "მანჩესტერ იუნაიტედში" გადავიდა.
საწყისი ნიშნები კარგი იყო, რამდენიმე მატჩში სახელდებოდა საუკეთესო ფეხბურთელად და "ლესტერის" მეკარეს, კასპერ შმეიხელს დიდებული გოლიც გაუტანა.
თუმცა 2014 წლის მიწურულს ტრავმა მიიღო, რომელმაც ანხელს ძლიერ შეუშალა ხელი.
იანგი დი მარიას დიდი გულშემატკივარია და აცხადებს, რომ ანხელის გადაბირებით "იუნაიტედმა" ჭკვიანური შენაძენი განახორციელა.
"ანხელი ფანტასტიური შენაძენია.
მადრიდის "რეალს" არაერთი დიდებული ფეხბურთელი ჰყავს, კრიშტიანუ რონალდუ და გარეტ ბეილი, მაგრამ დი მარიამ გასულ სეზონში მთელს გუნდში ჩემი ყურადღება გამორჩეულად მიიპყრო.
როცა ხარისხს უმატებ გუნდს, რომელსაც უკვე აქვს ხარისხი, ეს მხოლოდ სასარგებლო იქნება.
ვარჯიშის პირველ დღეებში ვნახეთ რამდენად კარგი ფეხბურთელია ანხელი და რას უნდა ველოდეთ მისგან. ნამდვილად დიდებული შენაძენია." - განაცხადა იანგმა.