ხუან მატა, რომელმაც 25 იანვარს "მანჩესტერ იუნაიტედში" ყოფნის ერთი წლის იუბილე აღნიშნა, აცხადებს, რომ თავის კლუბში ბედნიერია.
2014 წელს დევიდ მოიესის ხელმძღვანელობის ქვეშ "წითელმა ეშმაკებმა" ლონდონის "ჩელსიდან" ესპანელი ფეხბურთელი კლუბისთვის სარეკორდო თანხად, 37.1 მლნ. ფუნტად შეიძინეს.
მატა გადასვლისთანავე იქცა კლუბისთვის მნიშვნელოვან ფეხბურთელად და თავის გამოჩენაც არაერთხელ მოახერხა.
თუმცა ვან გაალის მოსვლის შემდეგ სეზონის დასაწყისში თითქოს მისი საქმე წარმატებით არ აეწყო და ხშირად სათადარიგოთა სკამზე ხვდებოდა.
მაგრამ პრემიერ ლიგის უკანასკნელი 10 შეხვედრა ხუანმა სასტარტო შემადგენლობაში დაიწყო და რამდენიმე მნიშვნელოვანი გოლიც გაიტანა.
"პირადად მე თავს კარგად ვგრძნობ. ბედნიერი ვარ და ისევე ვცდილობ თამაშს, როგორც აქამდე, მინდა გუნდს ჩემი უნარით დავეხმარო.
თქვენ თვითონაც ნახავდით რამდენი მატჩი ვითამაშე, რამდენად მნიშვნელოვანი გავხდი გუნდისთვის. ვგრძნობ, რომ მნიშვნელოვანი ვარ, ბევრი მატჩი ჩავატარე, ასე რომ, ბედნიერი ვარ.
გუნდში დიდი კონკურენციაა, არა მარტო ჩემთვის, ასე რომ, მიხარია, რომ ასე ხშირად მიხდება თამაში და მინდა სეზონის დარჩენილ ნაწილში უფრო მეტ მატჩში მივიღო მონაწილეობა.
აქ ძალიან ბედნიერი ვარ. გასული წელი კლუბის ისტორიაში საუკეთესო წელი ნამდვილად არ იყო. მაგრამ პირველი დღიდან დღემდე მოხარული ვარ ქომაგების, კლუბისა და თანაგუნდელების ჩემდამი განწყობით.
რამდენიმე გოლი გავიტანე, რამდენიმე საგოლე გადაცემა გავაკეთე. მინდა ეს უფრო და უფრო მეტად შევძლო და გუნდს ტიტულისთვის ბრძოლაში დავეხმარო. ვფიქრობ, სწორედ ამას უნდა ვაკეთებდეთ." - განაცხადა მატამ.
მატას სჯერა, რომ ლუი ვან გაალი წარმატების ფორმულას იპოვის.
"ის ცდილობს ფეხბურთელები შეამჩნიოს და გუნდის დასახმარებლად შესაფერის პოზიციაზე დააყენოს.
ჩვენ ბევრი ფეხბურთელი გვყავს და მისთვის რთულია თითოეული მათგანის გამწესება. მაგრამ ზოგიერთ შეხვედრაში შესანიშნავი ფეხბურთი ვაჩვენეთ, განსაკუთრებით ნოემბერსა და დეკემბერში." - დაასრულა ესპანელმა.