"მანჩესტერ იუნაიტედის" ყოფილი ფეხბურთელი, ლუკ ჩედვიკი, რომელიც ამჟამად "კემბრიჯის" რიგებში თამაშობს, იხსენებს თუ როგორ შეხვდა კენჭისყრის შედეგს და როგორ ემზადება მისი გუნდი მომდევნო მატჩისთვის.

"კენჭისყრის დროს დედაჩემი თმას მჭრიდა და თავში მხოლოდ ორი ნომერი მიტრიალებდა - "მანჩესტერ იუნაიტედისა" და "კემბრიჯ იუნაიტედის" ნომრები. როცა კენჭისყრა შედგა, მთელმა სახლმა ყურები დაცქვიტა." - განაცხადა ლუკმა.

ჩედვიკს "იუნაიტედში" 2000 წლიდან 2004 წლამდე 39 მატჩი აქვს ჩატარებული. 2001 წელს ისეთი თანაგუნდელების გვერდით თამაშობდა, როგორიც როი კინი, დევიდ ბექჰემი, პოლ სქოულზი და რაიან გიგზი არიან, რომლებთან ერთადაც ინგლისის ჩემპიონობა იზეიმა. მაგრამ ლუკს ესმის, რომ ახლა სულ სხვა "მანჩესტერ იუნაიტედს" დაუპირისპირდება და ქომაგების მხარდაჭერის ფონზე წარმატების მიღწევის იმედი აქვს.

"დღევანდელ კლუბში ჩემი დროიდან მხოლოდ გიგზი შემორჩა. დარენ ფლეთჩერი მაშინ ახალად იკიდებდა ფეხს პირველ გუნდში.

საკმაოდ კარგი შანსები გვაქვს, რადგან "მანჩესტერ იუნაიტედის" ქომაგის გარდა ყველას იმედი ექნება, რომ მოწინააღმდეგეს სიურპრიზს შევთავაზებთ. განსაკუთრებული საღამო იქნება - ნათურების შუქის ქვეშ "მანჩესტერ იუნაიტედის" წინააღმდეგ გამოვალთ და BBC One პირდაპირ ეთერში გვაჩვენებს. რთულია უკეთესი რამ ინატრო."

"ოლდ ტრაფორდის" დატოვების შემდეგ სანამ 2014 წელს "კემბრიჯში" გადავიდოდა, ლუკმა "ვესტ ჰემის", "სტოკ სიტის", "ნორვიჩისა" და "მკ დონსის" რიგებში მოასწრო თამაში. ახლა თავისი მშობლიური ქალაქის გუნდში თამაშისას იმედი აქვს, რომ წარმატებას მიაღწევს.

"ჩვენი გუნდის ფეხბურთელებს რეალური შანსი ეძლევათ იმის დასამტკიცებლად, რამდენად კარგები ვართ. მთელ მსოფლიოს ვაჩვენებთ, რას წარმოადგენს "კემბრიჯ იუნაიტედი" და ამ შანსს ჩავეჭიდებით." - დაასრულა ჩედვიკმა.

წყარო: manutd.ru