მარუან ფელაინი აცხადებს, რომ "მანჩესტერ იუნაიტედმა" ქპრ-ს საწყისი წუთებიდან უნდა შეუტიოს.
"ოლდ ტრაფორდზე" წინა ტურში განცდილი მარცხის შესახებ ფელაინიმ განაცხადა: "როცა გოლი მივიღეთ, უკანასკნელ 15 წუთში მომენტები შევქმენით. ამჯერად კი პირველივე წუთებიდან მზად უნდა ვიყოთ და დიდი ზეწოლა მოვახდინოთ, რათა შანსები შევქმნათ."
ფელაინის გამოჯანმრთელებამ ლუი ვან გაალს ნახევარდაცვის ხაზში კიდევ უფრო მეტი არჩევანი შესძინა. ჰოლანდიელმა სპეციალისტმა ბელგიელი ნახევარმცველი "საუთჰემპტონთან" მატჩში შეცვლაზე შეუშვა და ფელაინიმ შეტევაში დაიჭირა ადგილი.
"მწვრთნელმა მითხრა, რომ საჯარიმოში მეთამაშა და ჩაწოდებების დროს ორთაბრძოლები მომეგო. ეს გავაკეთე, მაგრამ გოლის გატანა ვერ მოვახერხეთ, ასე რომ, იმედგაცრუებულნი ვიყავით. წაგება რთულია."
ხუთი მატჩის გამოტოვების შემდეგ მარუანმა განაცხადა, რომ ის ფორმაშია და მწვრთნელს მოთხოვნის შესაბამისად ნებისმიერ დროს დაეხმარება.
"დაბრუნება კარგი იყო, თავს უკეთ ვგრძნობ. ხერხემალი დავიზიანე და ძალიან ავად ვიყავი, მაგრამ ახლა უკეთ ვარ და ყოველდღიურად ვვარჯიშობ, რათა ფორმაში ვიყო. როცა სამი კვირის განმავლობაში არაფერს აკეთებ, დაბრუნება რთულია, ასე რომ, ბევრი უნდა ვივარჯიშო."
"მიმდინარე კვირაში თითოეულმა ჩვენგანმა იშრომა და ვნახეთ, თუ როგორ თამაშობს ქპრ. ისინი ძალიან პირდაპირ თამაშობენ, ამიტომ ამისთვის მზად უნდა ვიყოთ. მაგრამ გოლის გასატანად შანსების შექმნა შეგვიძლია, ასე რომ, უნდა ჩავიდეთ იქ და ეს გავაკეთოთ." - განაცხადა მარუანმა.