"მანჩესტერ იუნაიტედის" ლეგენდები დენის ირვინი და არტურ ალბისტონი უკვე დარწმუნებულები არიან, რომ ლუკ შოუ მალე კლუბის ერთ-ერთი წამყვანი ფეხბურთელი გახდება.
ალბისტონის თქმით, რომელმაც "იუნაიტედში" 14 სეზონში 485 მატჩი ჩაატარა, შოუს ყველანაირი თვისება აქვს იმისთვის, რომ კლუბის საუკეთესო მარცხენა მცველი გახდეს.

"მან "საუთჰემპტონში" მშვენიერი ორი თუ სამი სეზონი ჩაატარა. ლუკს კარგი ფიზიკური მონაცემები აქვს, სწრაფი და მშვიდია, ბურთთან კომფორტულად გამოიყურება. ის სტიუარდ პირსს მაგონებს, რადგან ნებისმიერ დროს ეცდება შენს ძალით შეჩერებას თუ ეს საჭირო გახდება. თუ ფორმას შეინარჩუნებს, დარწმუნებული ვარ, შოუ ამ კლუბში კიდევ 10 წელი ითამაშებს.
ვფიქრობ, ყველა მატჩში ის უფრო და უფრო დამაჯერებლად გამოიყურება და ასეც უნდა იყოს, "იუნაიტედი" განსხვავდება "საუთჰემპტონისგან" და ახალ კლუბში ფეხბურთელს ყოველთვის დრო სჭირდება. შოუს პრობლემა არაფერთან აქვს, ის ყველაფერს ეგუება და პროგრესს აგრძელებს. დარწმუნებული ვარ, მომდევნო 10-15 წლის მანძილზე ის ინგლისის ნაკრების ძირითადის ფეხბურთელი იქნება. მისგან კიდევ ბევრს უნდა ველოდოთ". - დაასრულა არტურმა.

კოსტა რიკასთან ჩატარებული მატჩის შემდეგ შოუ 2014 წლის მსოფლიო ჩემპიონატის ყველაზე ახალგაზრდა ფეხბურთელი გახდა. ამ შეხვედრიდან სამი დღის შემდეგ დადასტურდა, რომ ის "იუნაიტედში" გააგრძელებდა კარიერას. დენის ირვინიც მას დიდ მომავალს უწინასწარმეტყველებს.

"ჩვენს კლუბში გადმოსვლამდე მას გიჟური ორი თვე ჰქონდა, მსოფლიო ჩემპიონატზე გამოსვლა 19 წლის ბიჭისთვის მეტისმეტად საპასუხისმგებლოა. მას დრო დასჭირდა დასამკვიდრებლად და იმის გასააზრებლად, თუ სად იმყოფება. ტრავმებმა შოუ უკან დახია, მაგრამ ის დაბრუნდა და კარგი შთაბეჭდილება დატოვა. ტრავმებთან პრობლემები აქვს, მაგრამ ჩვენთვის მაინც ფანტასტიკური მოთამაშეა. გარანტიას გაძლევთ, რომ წლების განმავლობაში, კლუბში შოუ თავის პოზიციაზე ნომერ პირველი იქნება. შოუ გამოცდილების შესაძენად საუკეთესო ასაკშია, ის ბევრს ისწავლის შეცდომების დაშვებით და ყველაფერს გაუმკლავდება. როცა მოთამაშეები ასაკში შევდივართ, კარგად ვხედავთ ახალგაზრდა ფეხბურთელის პერსპექტივებს, მე ამას ვხედავ და დამიჯერეთ, ლუკ შოუ "იუნაიტედისთვის" მალე ტოპ ფეხბურთელი გახდება." - დაასრულა ირვინმა.

წყარო: manutd.com