ცნობილი ინგლისელი მსახიობი, მაკს ბისლი მოგვითხრობს, თუ რა ადგილს იჭერს "მანჩესტერ იუნაიტედი" მის ცხოვრებაში.

"მცირე ხნის წინ მანჩესტერში ვიყავი და "ოლდ ტრაფორდზე" მისვლის შესაძლებლობა მომეცა. დიდი სიამოვნებით ვუყურებდი ბიჭებს საქმის დროს. ბოლო რამდენიმე წლის განმავლობაში ლოს-ანჯელესში ვცხოვრობ, ამიტომ "მანჩესტერ იუნაიტედის" თამაშების ცოცხლად ყურების საშუალება ნაკლებად მეძლევა. თუმცა "იუნაიტედის" თამაშზე მაშინ ვიყავი, როცა ისინი ამერიკაში ტურნეს აწყობდნენ."

"ყოველ ჯერზე, როცა მანჩესტერში ჩავდივარ მახსენდება ის შესანიშნავი დღეები, როცა სეზონური აბონიმენტები მქონდა და 1978 წელს "ოლდ ტრაფორდზე" პირველად როგორ მივედი. ჩემი კერპები გორდონ მაკქუინი, სტივ კოპნელი და ძმები გრინჰოფები იყვნენ. სტადიონზე ბაბუაჩემთან ერთად დავდიოდი, რომელიც "იუნაიტედის" ერთგული ქომაგი იყო."

"ლოგიკურად, "სიტის" ქომაგი უნდა გავმხდარიყავი. მას მამაჩემი და ჩემი საუკეთესო მეგობრები ქომაგობდნენ. მაგრამ მე "იუნაიტედი" შემიყვარდა. სინამდვილეში, ჩემი სამუშაოს შესრულებისას ყოველთვის ვცდილობ ჩემი გუნდისთვის რამე გავაკეთო. მაგალითად, ფილმში - "მოგვიანებით მომკალი" - ბექჰემის პლაკატი ფიგურირებს."

"გამიმართლა, შემიძლია რაიან გიგზი ჩემს მეგობრად მივიჩნიო. მიხარია, რომ სამწვრთნელო შტაბში შედის. არ ვფიქრობ, რომ არსებობს ადამიანი, ვინც "იუნაიტედს" უკეთ იცნობს. მას კოლოსალური ავტორიტეტი აქვს და მის აზრს ყველა აქცევს ყურადღებას. პირადად მე მიმაჩნია, რომ ოდესღაც "ოლდ ტრაფორდის" მახლობლად ძეგლს დაუდგამენ."

"არამგონია მიმდინარე წელს "იუნაიტედმა" ინგლისის ჩემპიონატი მოიგოს, თუ რა თქმა უნდა რამე კატასტროფული არ შეემთხვევა "ჩელსის". მაგრამ მჯერა, რომ მეორე ან მესამე ადგილს დავიკავებთ. წინ დიდებული დროება გველოდება." - განაცხადა მსახიობმა.

წყარო: manutd.com