ინგლისის პრემიერ ლიგის 21-ე ტურის შემდეგ "მანჩესტერ იუნაიტედი" მე-4 ადგილზე იმყოფება 37 ქულით, რაც ამ გუნდისთვის ცუდი შედეგია. "იუნაიტედის" ხელმძღვანელმა ედ ვუდვორდსმა "ტელეგრაფთან" ჩაწერილი ინტერვიუს დასაწყისშიც აღნიშნა, რომ ეს პერიოდი მის ცხოვრებაში ყველაზე რთულია და არამხოლოდ იმიტომ, რომ ხშირად მისთვის არასასიამოვნო კითხვებზე უწევს პასუხების გაცემა. ვუდვორდსი საუბრობს თუ როგორ უნდა გამოვიდეს გუნდი კრიზისიდან და რა საქმეებითაა დაკავებული კლუბის ხელმძღვანელობა...

- როგორი სიტუაციაა გუნდში?

- "პრემიერ ლიგის სატურნირო ცხრილს თუ ჩახედავთ, მიხვდებით, რომ ცუდ და ექსტრემალურ სიტუაციაში ვართ. თუმცა ეს ყველაფერი გამოსწორებადია. თითოეულ მატჩში დაშვებული შეცდომები გავაანალიზეთ და სამომავლო გეგმები დავსახეთ. ვაგრძელებთ მუშაობას იგივე შემადგენლობით და მომავლის რწმენა გვაქვს".

- იგივე შემადგენლობით, ანუ ზამთრის ტრანსფერებზე ახალი ფეხბურთელის დამატებას არ აპირებთ?

- "რამდენიმე კლუბთან მოლაპარაკებებს ვმართავთ, თუმცა კონკრეტულად ვერაფერს გეტყვით".

- დაფიქრება ხომ არ ღირს? ვან გაალი "მანჩესტერის" შესაფერისი მწვრთნელია?

- "დიახ ვან გაალი სწორედ "იუინაიტედის" შესაფერისი მწვრთნელია და ამ საკითხთან დაკავშირებით ეჭვი არაფერში მეპარება. ლუის სრულ ნდობას ვუცხადებთ. პირდაპირ საოცარია - სულ რამდენიმე თვის წინ მსოფლიო ჩემპიონატზე ყველა მას აქებდა, ახლა კი უცბად აღმოაჩინეთ, რომ "იუნაიტედის" კალიბრის სპეციალისტი არ არის. ეს უბრალოდ სასაცილოა. იგი პირველად მუშაობს ინგლისსში, ამიტომ დრო ყველაფერს ჩვენს სასიკეთოდ აჩვენებს".

- მისთვის ულტიმატუმი ხომ არ წაგიყენებიათ? დაუდგინეთ ვადა, რა დროშიც გუნდი კრიზისიდან უნდა გამოიყვანოს?

- "არ იქნებოდა ჩვენი მხრიდან ულტიმატუმების წაყენება სწორი საქციელი".

- აბარგება ვის მოუწევს?

- "ნებისმიერი შეიძლება წავიდეს, ამ საკითხისთვის ტაბუ არავის დაუდია. თუმცა, მჯერა, უმრავლესობას შევინარჩუნებთ და ამ რთულ გზას ერთად გავივლით. თუ რომელიმე ფეხბურთელის სამსახური აღარ დაგვჭირდება, ამას ის პირველ რიგში ჩვენგან შეიტყობთ და არა პრესის ფურცლებიდან".

წყარო: www.telegraph.co.uk