"მანჩესტერ იუნაიტედის" მწვრთნელი, ლუი ვან გაალი დარწმუნებულია, რომ დე ხეა ახალ კონტრაქტს ხელს მოაწერს.
მიმდინარე სეზონის დასრულების შემდეგ დე ხეას მოქმედი კონტრაქტით მხოლოდ ერთი წელი დარჩება. ამასთან დაკავშირებით და დავიდის საოცარი ფორმის ფონზე, სულ უფრო ძლიერდება 24 წლის მეკარის მიმართ მადრიდის "რეალის" ინტერესის შესახებ გავრცელებული ჭორები.
ჭორები კიდევ უფრო გაძლიერდა, როცა "იუნაიტედმა" წელიწადნახევრიანი კონტრაქტი გააფორმა ვიქტორ ვალდესთან.
თუმცა ლუი ვან გაალი დარწმუნებულია, რომ დე ხეას შენარჩუნებას მოახერხებს.
"დიახ, ვფიქრობ, რომ დარჩება. არავითარი პრობლემა არ უნდა შეგვექმნას მასთან კონტრაქტის გაფორმებასთან დაკავშირებით."
"მხოლოდ იმის თქმა შემიძლია, რომ ჩემი აქ ყოფნის 6 თვის განმავლობაში დავიდმა ძალიან მოუმატა. კმაყოფილი ვარ მისი განვითარებით." - განაცხადა ვან გაალმა.