"მანჩესტერ იუნაიტედის" ყოფილი მცველი, მიკაელ სილვესტრი დარწმუნებულია, რომ ლუკ შოუ ტრავმის მოშუშების შემდეგ კიდევ უფრო უკეთ ითამაშებს.
ახალგაზრდა მცველი ლუი ვან გაალის ერთ-ერთი პირველი შენაძენი იყო მიმდინარე სეზონის დასაწყისში. ლუკმა ტრავმის გამო სეზონის დიდი ნაწილი გამოტოვა და მოედანზე მხოლოდ 8-ჯერ გამოჩნდა.
ოთხშაბათს ინგლისელმა 6 კვირის განმავლობაში პირველად ჩაატარა შეხვედრა სასტარტო შემადგენლობაში და სილვესტრი დარწმუნებულია, რომ სათამაშო პრაქტიკის ფონზე ლუკის თამაში კიდევ უფრო გაუმჯობესდება.
"შოუმ უდროო დროს მიიღო ტრავმა, მაგრამ სეზონი გრძელია და დარწმუნებული ვარ, რომ ძველ ფორმას დაუბრუნდება. ახლა მასზე დიდ ზეწოლას ახდენენ, მაგრამ ლუკი მხარდაჭერასაც იღებს."
"ეს მისი ხასიათის გამოცდა იქნება, მაგრამ ვფიქრობ მას ყველაფერი აქვს ერთ-ერთ საუკეთესო ფეხბურთელად ჩამოყალიბებისთვის. ის მსოფლიოს ერთ-ერთი საუკეთესო გუნდის ფეხბურთელია და ამაში მხოლოდ პლუსებს ვხედავ. დროთა განმავლობაში მისი თამაში გაუმჯობესდება."
მიკაელს ასევე მიაჩნია, რომ "იუნაიტედის" დაცვის ხაზში მარკოს როხო უკვე გახდა წამყვანი ფიგურა: "მსოფლიო ჩემპიონატზე მის თამაშს არგენტინის ნაკრებში თავდაპირველად იშვიათად ვუყურებდი. დარწმუნებული ვიყავი, რომ მისი ფიზიკური ძალა და ტექნიკა პრემიერ ლიგაში "იუნაიტედის" სათამაშო სტილს მოერგებოდა. ასე რომ, არ მიკვირს და დარწმუნებული ვარ, რომ მას ყველაფერი გამოუვა."