"მანჩესტერ იუნაიტედის" მიერ გატანილი დეკემბრის თვის საუკეთესო გოლისთვის 7 კანდიდატი იბრძოლებს.
ნოემბერში ამ პრიზის მფლობელი რობინ ვან პერსი გახდა, რომელმაც "ჰალ სიტის" კარი შორეული დარტყმით აიღო. რობინი დეკემბრის თვის საუკეთესო გოლის ავტორობისთვისაც იბრძოლებს.
ნომინაციაში ჰოლანდიელის მიერ "საუთჰემპტონის" კარში გატანილი მეორე გოლი და "ნიუკასლის" კარში გატანილი თავური მიიღებს მონაწილეობას. ორივე შემთხვევაში რობინს ასისტენტობა უეინ რუნიმ გაუწია.
პრიზისთვის იბრძოლებს რუნის მიერ გატანილი ორი გოლიც, რომლებიც მან "ლივერპულსა" და "ნიუკასლს" გაუტანა. პირველ შემთხვევაში რუნის საგოლე გადაცემა ვალენსიამ მიაწოდა, ხოლო მეორე გოლის შემთხვევაში ასისტენტობა რადამელ ფალკაომ გასწია.
ნომინაციის გარეშე არ დარჩენილა არც კოლუმბიელი ფორვარდი და მის მიერ "ასტონ ვილას" კარში გატანილი თავური გოლი ერთ-ერთი გამორჩეული გახლდათ გასული წლის ბოლო თვეში.
კიდევ ერთი ავტორი, რომელმაც ასევე თავური გოლი გაიტანა, მარუან ფელაინი გახლავთ, რომელმაც "სტოკ სიტის" კარი საშინაო მატჩში დალაშქრა.
წარმომადგენლის გარეშე არ დარჩენილა არც ახალგაზრდული გუნდი - ზაკ დირნლიმ ასოციაციის თასის 18 წლამდელთა გათამაშებაში "ბერის" ულამაზესი გოლი გაუტანა.