ახალი წლის პირველივე დღეს, "სტოკ სიტისთან", გასამართი შეხვედრის წინ, "იუნაიტედის" თავკაცი ჟურნალისტებს შეხვდა და მათ კითხვებს პასუხები გასცა. ასევე ჰოლანდიელმა სპეციალისტმა ტრავმირებულთა შესახებ ისაუბრა და სიახლეები გააცნო პრესის თანამშრომლებს.
MUTV-ის ჟურნალისტებმა ვან გაალს გასული 6 თვის შესახებ ჰკითხეს, თუ რა ისწავლა მან, რამ გააოცა და ასე შემდეგ: "ჩვენ ვპროგრესირებთ - ეს ყოველი კვირის ბოლოს უფრო თვალნათლივ ჩანს, ჩვენ უკეთესები ვხდებით. შედეგი მისაღებია, თუმცა გაცილებით მეტი შეგვიძლია. აქ ყოფნისას "იუნაიტედის" გულშემატკივარმა გამაოცა, ისინი საოცრები არიან. ის თუ როგორ უყვართ მათ გუნდი, როგორ სჯერათ მოთამაშეების და მწვრთნელების, ეს დაუჯერებელია.
11 მატჩის შემდეგ ჩვენ მხოლოდ 13 ქულა გვქონდა, რაც კარგი ნამდვილად არ არის, მეტიც ეს საშინელებაა, თუმცა ისინი მაინც ჩვენ გვერდით იდგნენ და ვფიქრობ ეს იმიტომ რომ, ჩემი გუნდი მებრძოლ სულს აჩვენებდა. სწორედ ასეთი სული აქვთ ფანებსაც, ჩვენ არ ვიყავით ყოველთვის კარგები, თუმცა ისინი ბოლო წუთებამდე თავდაუზოგავად გვქომაგობდნენ. მინდა ამ ყველაფრისთვის მათ მადლობა გადავუხადო. "
პრეს-კონფერენციის მთავარი ფიგურები ანდერ ერერა და ადნან იანუზაი იყვნენ, რომლებიც ლუის თქმით ვარჯიშს დაუბრუნდნე და უახლოეს მატჩებში დაეხმარებიან გუნდს, ასევე იგი სხვა მოთამაშეების მდგომარეობასაც შეეხო:
"ფეხბურთელები ბრუნდებიან, ეს ბოლო ორ მატჩშიც გამოჩნდა, როდესაც მე მოედანზე გასვლის უფლება ლუკ შოუს, რაფაელს და კრის სმოლინგს მივეცი, თუმცა ისინი თამაშის რიტმს ვერ აჰყვნენ და ეს არის უდიდესი პრობლემა. ეს სხვა მოთამაშეებსაც ეხებათ. ჩვენ 1 კვირის განმავლობაში 3 მატჩის ჩატარება მოგვიწია, ამიტომ მე მჭირდება ახალი სისხლი. ახლა ჩემთვის რთული იქნება შემადგენლობის არჩევა.
ერერამ დღეს ივარჯიშა, თუმცა ეს პირველად მოხდა ტრავმის შემდეგ და დიახ მას არ აქვს ძალა რიტმს აჰყვეს. ადნანმა უკვე ორჯერ მოასწრო ვარჯიში, მაგრამ ის ავად იყო და ეს გაცილებით ართულებს სიტუაციას, რადგან ავადმყოფობა ძალას გართმევს."
ლუი ვან გაალმა მანჩესტერში ცხოვრებაზეც ისაუბრა: "ინგლისში ცხოვრება ფანტასტიურია. ყოველ დღე ქუჩაში ძალიან მეგობრულ ხალხს ვხვდები. საჭმელი ძალიან კარგია, როდესაც მე ინგლისში მოვდიოდი ყველა მეუბნებოდა რომ არ მომეწონებოდა, თუმცა პირიქით. ასევე ღვინოც ძალიან კარგი გაქვთ. ძალიან საყვარელი მეზობლები მყავს, ყველა მათგანი ჩემზე ხნიერია, თუმცა ისინი მშვენივრად გამოიყურებიან."