ლუი, "ასტონ ვილასთან" მატჩის შემდეგ თქვით, რომ ერთი ქულით იმედგაცრუებული ხართ. რას იტყვით დღეს?
დღესაც იმედგაცრუებული ვარ. ჩემი აზრით, პირველი ტაიმი დიდებულად ვითამაშეთ, ბევრი საგოლე მომენტი შევქმენით, მაგრამ მათი რეალიზება ვერ შევძელით, ეს ჩვენთვის ჯილდო იქნებოდა. მეორე ტაიმში ძალიან გაგვიჭირდა. ჩვენი ფეხბურთელები დაიღალნენ, მოწინააღმდეგისაც. "ტოტენჰემი" ჩვენზე უკეთესად გამოიყურებოდა წართმევაზე და მეორე ტაიმის საერთო ჯამში უკეთესი იყო. მათაც სამი საგოლე მომენტი შექმნეს, ისევე როგორც ჩვენ, ამიტომ ვფიქრობ, ორი ქულა დავკარგეთ.
პირველ ტაიმში შეგეძლოთ რამდენიმეჯერ გაგეტანათ. ფიქრობთ, რომ გუნდს არ გაუმართლა, თუ სხვა რამემ იქონია გავლენა?
ასე ვერ ვიტყვით. გამართლება ყოველთვის აუცილებელია, მათ შორის გატანილი გოლების შემთხვევაშიც. უბრალოდ გასაკვირია, როგორ ვერ გავიტანეთ პირველ ტაიმში.
უკვე თქვით, რომ მეორე ტაიმი სრულიად განსხვავებული გამოვიდა. მოთამაშეებს გაუჭირდათ. ამას მათ ფიზიკურ მდგომარეობას უკავშირებთ?
დიახ, ასეა. ძალიან რთულია ორ დღეში აღდგენა. "ტოტენჰემის" შემადგენლობაშიც გამოვიდნენ ფეხბურთელები, რომელთაც პარასკევის მატჩში მიიღეს მონაწილეობა. არც მათთვის იყო იოლი.
არც კი მინდოდა ამის შეხსენება, რადგან ტრავმა "იუნაიტედს" მიმდინარე სეზონში თან დაჰყვება, მაგრამ ხომ არ იყო რამე დაზიანება დღეს? შესვენებაზე თქვენ რაფაელი...
დიახ. ვალენსიას ბარძაყის ტრავმა აქვს. შესვენებაზე ნათელი გახდა, რომ მცირე დაზიანება ჰქონდა, ამიტომ ასეთი გადაწყვეტილება მივიღე. უფრო დაწვრილებით გამოკვლევას დაველოდოთ.
მომდევნო მატჩამდე აღდგენისთვის ოთხი დღე გაქვთ...
დიახ, უნდა გვეყოს. მაგრამ ფეხბურთელებმა უკვე ჩაატარეს ორი შეხვედრა, ამიტომ დასვენებისთვის უფრო მეტი დრო სჭირდებათ.