ეს ძალზედ უცნაური წელი გამოდგა.

26 წლიანი ხელმძღვანელობის შემდეგ სერ ალექს ფერგიუსონი წავიდა. კლუბში ორი ახალი მწვრთნელი მოვიდა, განსხვავებული შეხედულებებითა და შედეგებით.

Manchester Evening News კი გვახსენებს თუ როგორც ჩაატარა ,,იუნაიტედმა'' 2014 წელი.

იანვარი. 7 თამაში: 3 მოგება და 4 წაგება.

ახალ 2014 წელს ,,წითლები'' საკუთარ კედლებში ლონდონის ,,ტოტენჰემთან'' დამარცხებით შეხვდნენ. პირველი გოლი ემანუელ ადებაიორმა გაიტანა, გამოიყენა რა კრისტიან ერიკსენის გადაცემა, რომელმაც შემდეგ თვითონაც გაიტანა და ლონდონელები წინ ორ ბურთიანი უპირატესობით გაიყვანა. ,,მანჩესტერმა'' მხოლოდ ერთი გოლის გაქვითვა მოახერხა და ეს ახლა უკვე ,,არსენალის'' ფეხბურთელმა დენი უელბეკმა შეძლო.

აღსანიშნავია რომ ეს იყო პირველი იმ სამ მარცხთაგან, რომელშიც ,,იუნაიტედმა'' მატჩები ერთნაირი ანგარიშით 2-1 წააგო. შემდეგი ორი დამარცხება ,,ეშმაკებმა'' ინგლისის თასზე ,,სუონსისთან'' და ინგლისის ლიგის თასზე ,,სანდერლენდთან'' იწვნიეს.

სატრანსფერო ბაზარზე კი ,,იუნაიტედი'' კარგად გაისარჯა და 37 მილიონად ხუან მატა შეიძინა ლონდონის ,,ჩელსიდან''



თებერვალი. 5 მატჩი: 1 მოგება, 2 ფრე და 2 წაგება.

გუნდს საქმე სულ უფრო უკან წაუვიდა. ამას ისიც დაემატა რომ ჩატარებული 5 თამაშიდან 4 მათ სტუმრად ითამაშეს.

იმედგაცრუება სახლში ,,ფულჰემთან'' დაკარგული ქულებით დაიწყო, როცა დარენ ბენტმა მასპინძელ გუნდს შეხვედრის ბოლო წუთებში 2 ქულა დააკარგვინა. თუმცა ეს მატჩი ისტორიულიც გამოდგა, ამ თამაშში ,,იუნაიტედის'' ფეხბურთელებმა სარეკორდო 81 ჩაწოდება განახორციელეს. მატჩის შემდგომ ,,ფულჰემის'' ერთ-ერთმა მცველმა დენ ბერნმა კიდევაც განაცხადა რომ მას თავით ამდენჯერ არასოდეს ეთამაშა.

გუნდმა კრახი განიცადა ათენშიც და შეხვედრა დამსახურებულად წააგო ,,ოლიმპიაკოსთან'' ანგარიშით 2-0. კითხვის ნიშნის ქვეშ დადგა ასპარეზობის გაგრძელება ჩემპიონთა ლიგის შემდეგ ეტაპზე.



მარტი. 6 მატჩი: 3 მოგება და 3 წაგება.

მარტის თვის პირველი შეხვედრა ,,მანჩესტერმა'' 3-0 მოიგო, გასვლაზე მათ ,,ვესტ ბრომვიჩი'' დაამარცხეს. ეს ანგარიში დაფიქსირდა რამდენიმე დღის შემდეგ ,,ოლდ ტრაფორდზე'' ,,ლივერპულთან'' გამართულ მატჩში, მაგრამ აქ უკვე ,,მერსისაიდელებმა'' იმარჯვეს. ,,ეშმაკებს'' სატურნირო მდგომარეობა უფრო და უფრო ურთულდებოდათ.

დასამახსოვრებელი ამ თვეში ,,ოლიმპიაკოსთან'' 3-0 მოგებული მატჩი იყო, სადაც რობინ ვან პერსიმ ჰეთ-თრიკი შეასრულა და გუნდი 1/4 ფინალში გაიყვანა.



აპრილი. 5 მატჩი: 2 მოგება, 1 ფრე და 2 წაგება.

,,ბაიერნმა'' ინგლისელები ჩემპიონთა ლიგას გამოამშვიდობა, ამის ატანას ალბათ ხელმძღვანელობა შეძლებდა, მაგრამ ,,ევერტონთან'' 2-0 გასვლაზე წაგებული მატჩის შემდეგ დევიდ მოიესი გაათავისუფლეს.

მოიესის გათავისუფლებას ,,იუნაიტედმა'' ,,ნორვიჩზე'' გამარჯვებით უპასუხა: სანახაობრივი თამაშითა და დამაჯერებელი ანგარიშით 4-0. ეს რაიან გიგზის მწვრთნელის რანგში ჩატარებული პირველი შეხვედრაც იყო, რომელიც მან გამარჯვებით დაიწყო.

მაისი. 5 მატჩი: 3 მოგება, 1 ფრე და 1 წაგება.

,,იუნაიტედის'' ისტორიაში ერთ-ერთი კატასტროფული სეზონი ,,საუთჰემპტონთან გასვლითი მატჩით დასრულდა ფრედ 1-1. თვის ყველაზე დასამახსოვრებელი მომენტი ჯეიმს უილსონის დებიუტი და ,,ჰალ სიტის'' კარში მისი ორი გატანილი გოლი იყო.

საბოლოოდ სეზონი ,,იუნაიტედმა'' მე-7 პოზიციაზე დაასრულა, ჩემპიონ ,,სიტისთან'' ჩამორჩენა 22 ქულას შეადგენდა. 25 წლის განმავლობაში კლუბი პირველად დარჩა ევროთასების გათამაშების მიღმა. ოფიციალურად გამოცხადდა რომ ახალ სეზონში გუნდს ლუი ვან გაალი ჩაიბარებდა.

ივნისი. მსოფლიო ჩემპიონატი.

,,მანჩესტერის'' რიგებიდან მუნდიალზე 14 ფეხბურთელი გაემგზავრა: დავიდ დე ხეა, ხუან მატა (ესპანეთი), პატრის ევრა (საფრანგეთი), ფილ ჯონსი, უეინ რუნი, დენი უელბეკი, კრის სმოლინგი (ინგლისი), ნანი (პორტუგალია), რობინ ვან პერსი (ჰოლანდია), ანტონიო ვალენსია (ეკვადორი), სინძი კაგავა (იაპონია), მარუან ფელაინი, ადნან იანუზაი (ბელგია), ხავიერ ერნანდესი (მექსიკა).

კლუბის ხელმძღვანელობა სატრანსფერო ბაზარზე გააქტიურდა, რის შედეგადაც ანდერ ერერასა და ლუკ შოუს შეძენა მოახერხა.



ივლისი. ''ველქამ ლუი'' ! საზაფხულო ტურნე.

მსოფლიო ჩემპიონატი ვან გაალმა ჰოლანდიის ეროვნულ ნაკრებთან ერთად მე-3 ადგილზე დაასრულა და ამის შემდეგ ის ,,ოლდ ტრაფორდზე'' ჩამოვიდა ახალი საქმიანობის დასაწყებად. ლუიმ ,,იუნაიტედი'' ოფიციალურად ჩაიბარა.

ჰოლანდიელი ბობი ჩარლტონის მიერ იქნა წარდგენილი.

ამის შემდეგ ლუი გუნდთან ერთად ამერიკაში გაემგზავრა. მათ ტურნე ,,გალაქსის'' განადგურებით დაიწყეს (,,იუნაიტედი''-,,გალაქსი 7-0''), რის შემდეგაც ,,მანჩესტერი'' ,,international champions cup''-ის გათამაშებაში ჩაერთო და ,,რომასა'' და ,,ინტერის'' დამარცხება მოახერხა.



აგვისტო. 4 მატჩი: 2 ფრე და 2 წაგება. (ამხანაგური მატჩების შედეგების გარეშე)

წინასასეზონო თასის გათამაშება ,,იუნაიტედმა'' ,,რეალსა'' და ,,ლივერპულზე'' გამარჯვებით დაასრულა, რის შედეგადაც ისინი გათამაშების ჩემპიონები გახდნენ. მანჩესტერში დაბრუნებულებმა კი კიდევ ერთი ამხანაგური მატჩი გამართეს, ამჯერად უკვე ,,ოლდ ტრაფორდზე'', სადაც ,,ეშმაკებმა'' ესპანურ ,,ვალენსიას'' 2-1 სძლიეს.

ამის შემდეგ კი უკვე ინგლისის ჩემპიონატი იწყება, სადაც ,,წითელი ეშმაკები'' პირველივე ტურში საკუთარ მოედანზე მარცხდებიან ,,სუონსისთან'' (,,მანჩესტერი''-,,სუონსი'' 1-2). ეს გახდა პირველი საშინაო მარცხი ჩემპიონატის სტარტზე 1972 წლის შემდეგ. გარდა ამისა სტუმრებმა ჩემპიონატის ფარგლებში პირველად იმარჯვეს ,,ოლდ ტრაფორდზე''.

,,მკ დონსთან'' 4-0 წაგებული მატჩის შემდეგ ,,იუნაიტედი'' თასის გათამაშებასაც გამოეთიშა.

კარგი ამბები კვლავ სატრანსფერო ბაზრიდან მოდიოდა. სარეკორდო 60 მილიონ ფუნტად კლუბმა მადრიდის ,,რეალისგან'' არგენტინელი ვინგერი ანხელ დი მარია გაიფორმა, რომელმაც სადებიუტო მატჩი ,,ბარნლისთან'' ჩაატარა. (,,ბარნლი''-,,იუნაიტედი'' 0-0)

სექტემბერი. 3 მატჩი: 2 მოგება და 1 წაგება.

სატრანსფერო ფანჯრის დახურვამდე რამოდენიმე საათით ადრე კოლუმბიელი რადამელ ფალკაო იჯარით იქნა აყვანილი ფრანგული ,,მონაკოდან''.

,,იუნაიტედმა'' 2 გამარჯვების მოპოვება მოახერხა ,,ოლდ ტრაფორდზე''. ,,ქპრ''-თან მატჩში პირველი გოლი გაიტანეს ანხელ დი მარიამ და ანდერ ერერამ, მოედანზე გამოჩნდა და სადებიუტო მატჩი ჰქონდა ასევე რადამელ ფალკაოსაც.

თვე კი საკმაოდ ცუდად დასრულდა. გასვლით მატჩში ,,ლესტერთან'' ,,წითლები'' ჯერ 2-0, ხოლო შემდეგ კი 3-1 იგებდნენ, მაგრამ საბოლოოდ მატჩი 5-3 დათმეს. აღსანიშნავია ისიც, რომ ამ გამარჯვების შემდეგ ნაიჯელ პირსონის შეგირდებს შემდეგი 12 მატჩის განმავლობაში არ გაუმარჯვიათ.

ოქტომბერი. 3 მატჩი: 1 მოგება და 2 ფრე.

კლუბი დაუმარცხებელი დარჩა ამ თვეში, მაგრამ გასვლით შეხვედრაში მათ კვლავ ვერ გაიმარჯვეს. ,,ვესტ ბრომვიჩთან'' მარცხისგან ,,წითლები'' დეილი ბლინდმა იხსნა და საბოლოოდ ,,იუნაიტედი'' 1 ქულას დასჯერდა. თვის მთავარი გმირი დავიდ დე ხეა გახდა. ,,ევერტონთან'' მატჩში მან სენსაციური სეივები განახორციელა. არაჩვეულებრივად ითამაშა მან ,,ჩელსის'' წინააღმდეგაც, სადაც ,,მანჩესტერმა'' 1 ქულა ვან პერსის მიერ შეხვედრის ბოლო წუთზე გატანილი გოლის წყალობით მოიპოვა.



ნოემბერი. 4 მატჩი: 3 მოგება და 1 წაგება.

თვე არასასიამოვნოდ დაიწყო, გუნდი დერბში დამარცხდა. მაგრამ ეს ჯერ-ჯერობით ბოლო წაგებაა ,,იუნაიტედის'' მიმდინარე სეზონში. კრის სმოლინგის დაუფიქრებელი თამაშის გამო ,,ეშმაკებმა'' მატჩი 10 კაცით ჩაატარეს და დაისაჯნენ კიდეც, გოლი მათ სერხიო აგუერომ გაუტანა.

მას შემდეგ ,,მანჩესტერმა'' ზედიზედ 3 მატჩში იმარჯვა, მათ შორის გასვლით შეხვედრაში ,,არსენალის'' წინააღმდეგ.

ამ თვის ბოლო მატჩი კი ,,ოლდ ტრაფორდზე,, ,,ჰალ სიტის'' განადგურებით დასრულდა. (,,მანჩესტერი''-,,ჰალი'' 3-0)



დეკემბერი. 4 მატჩი: 3 მოგება და 1 ფრე.

ნოემბერში დაწყებული გამარჯვებები ,,იუნაიტედმა'' დეკემბერშიც განაგრძო. ,,სტოკ სიტისა'' და ,,საუთჰემპტონის'' დამარცხების შემდეგ ,,წითელმა ეშმაკებმა'' მე-3 პოზიციაზე გადაინაცვლეს. საკუთარ გულშემატკივრებს არაჩვეულებრივი მატჩი აჩუქეს ,,ლივერპულის'' განადგურებით (,,იუნაიტედი''-,,ლივერპული'' 3-0). ზედიზედ მე-7 მატჩში 3 ქულის აღებას კი ხელი ,,ასტონ ვილამ'' შეუშალა. თუმცა ამას ,,იუნაიტედის'' განწყობაზე ცუდი ზეგავლენა არ მოუხდენია და ,,ბოქსინგ დეის'' პირველ მატჩში მათ ,,ოლდ ტრაფორდზე'' ,,ნიუკასლი'' დამაჯერებლად 3-1 დაამარცხეს. მიმდინარე წელს კი ,,წითელი ეშმაკები'' ლონდონში ,,ტოტენჰემთან'' გასამართი მატჩით დაასრულებენ.



წყარო: carrick.ru