მანჩესტერული კლუბის დირექტორთა საბჭომ ვან გაალის წინაშე ჩემპიონთა ლიგაზე გასვლის მიზანი დასახა, მაგრამ თავად ჰოლანდიელს უფრო მეტის იმედი აქვს.

გასული სეზონის შედეგებით "მანჩესტერ იუნაიტედი" ჩემპიონთა ლიგის მიღმა დარჩა, რაც 1995 წლის შემდეგ პირველი შემთხვევა გახლდათ და ვან გაალი აცხადებს, რომ აღმასრულებელმა დირექტორმა, ედ ვუდვორდმა და გლეიზერების ოჯახმა მას პრესტიჟულ ტურნირზე დაბრუნება დაავალეს.

"იუნაიტედი" ამჟამად პრემიერ ლიგის ცხრილის მესამე ადგილზე იმყოფება და ლუი იმედს არ კარგავს.

"ყველაზე დიდი მიღწევა - ჩემპიონობაა, ჩემპიონობა მიმდინარე სეზონში ჩვენი მიზანია. ფეხბურთში იყო ნომერ პირველი - ყველაფერზე მნიშვნელოვანია."

"ჩვენ პირველი ადგილის დაკავებისკენ ვისწრაფვით, მაგრამ როგორც იცით, ეს ადვილი არ არის. სწორედ ამიტომ, დირექტორთა საბჭო ჩემგან ოთხეულს ელოდება. მაგრამ ჩემ ფეხბურთელებთან და სამწვრთნელო შტაბთან ერთად მეტის მიღწევა გვსურს."

"სტოკ სიტის" წინააღმდეგ 1 იანვარს გასამართი გასვლითი შეხვედრა სეზონის მეორე წრეს დაიწყებს, მანამდე კი "იუნაიტედი" "ნიუკასლსა" და "ტოტენჰემს" შეხვდება, სადაც "წითლები" ლიდერი "ჩელსისთვის" დაწევას ეცდებიან.

ვან გაალი აღიარებს, რომ შობის პერიოდში პირველ ადგილზე ყოფნა ჩემპიონობისთვის ბრძოლაში დიდი პლუსია, მაგრამ ჰოლანდიელს, რომელიც სამშობლოში, გერმანიასა და ესპანეთში ჩემპიონი გახდა ისიც კარგად ესმის, რომ უმჯობესია სატურნირო ცხრილს მაისში ჩაუდგე სათავეში, ვიდრე დეკემბერში.

"ჰოლანდიასა და გერმანიაში ზამთრის ჩემპიონებს დიდ მნიშვნელოვას ანიჭებენ - ამჟამად ასეთი გუნდები "პსვ" და "ბაიერნია", მაგრამ მაისის ბოლოს ამას მნიშვნელობა საერთოდ არ აქვს: სეზონის დასასრულს პირველი უნდა იყო. დიახ, შობის დროს დაკავებული პირველი ადგილი თავის როლს თამაშობს, ჩემპიონობის შანსი იზრდება, მაგრამ დეკემბერში ჩემპიონები არ ხდებიან." - განაცხადა ჰოლანდიელმა.

წყარო: carrick.ru