ლუი ვან გაალი "მანჩესტერ იუნაიტედის" ყოფილი მწვრთნელის, სერ ალექს ფერგიუსონის სიტყვებს გამოეხმაურა.
მცირე ხნის წინ მიცემულ ინტერვიუში ფერგიუსონმა ვან გაალის მისამართით საქებარი სიტყვები არ დაიშურა და განაცხადა, რომ ტრავმირებული ფეხბურთელების დაბრუნების შემდეგ ის აუცილებლად მოიტანს "ოლდ ტრაფორდზე" წარმატებას.
შობის მილოცვისა და სადღეგრძელოს დალევის შემდეგ ვან გაალმა ფერგიუსონის სიტყვების საპასუხო კომენტარი გააკეთა.
"ფანტასტიურია, როცა "მანჩესტერ იუნაიტედში" მოდიხარ. რადგან სერ ალექსს იცნობ იმედი გაქვს, რომ ის მხარს დაგიჭერს. როცა ის მხარს გიჭერს, თანაც ამას არა ერთხელ, არამედ თითოეული მიცემული ინტერვიუს დროს აკეთებს, ეს ჩემს რწმენას თავდაჯერებულობას სძენს. მე ეს მჭირდება როგორც მწვრთნელს და როგორც "მანჩესტერ იუნაიტედის" მენეჯერს."
"შენ გჭირდება ისეთი მწვრთნელის რწმენა და მხარდაჭერა, როგორიც სერ ალექსია, მაგრამ არა მარტო მისი, არამედ ბობი ჩარლტონისა და დევიდ გილისაც. მე ამ რწმენას ვგრძნობ და ბედნიერი ვარ, რადგან ასეთ დროს მუშაობა გაცილებით ადვილია. ეს ასევე ზეწოლაა, რადგან მას შენი სჯერა და შენ აუცილებლად უნდა აჩვენო რწმენის შესაბამისი შედეგი. პრემიერ ლიგის მატჩების მოგება კი ადვილი არ არის." - განაცხადა ვან გაალმა.