ფილ, "ლივერპულთან" მატჩში მოედანზე გახვედით, თუმცა 100%-თ მზად არ იყავით. როგორი გრძნობა იყო გუნდში დაბრუნება?

რა თქმა უნდა, მოედანზე გასვლით ძალიან გახარებული ვიყავი. ის მატჩი მოვიგეთ, ხოლო მერსეისაიდელების დამარცხებას ჯერ კიდევ წინა წლის შემდეგ ველოდებოდით.

"იუნაიტედს" გამარჯვებათა 6 მატჩიანი სერია ჰქონდა, წინ კი მნიშვნელოვანი პერიოდი იწყება. როგორ ფიქრობთ, შეძლებს გუნდი წარმატების შენარჩუნებას?

დღემდე ბიჭები შესანიშნავად უმკლავდებოდნენ გადატვირთულ გრაფიკს. სეზონის დასაწყისში პრობლემები გვქონდა, მაგრამ ახლა ვაჩვენეთ, რომ კარგი გუნდი გვყავს. ბევრ საგოლე მომენტს ვქმნით და იმედი მაქვს, ასეც გავაგრძელებთ.

თქვენი მთავარი მწვრთნელი პერფექციონისტს ჰგავს. მის ირგვლივ განსაკუთრებული აურა ტრიალებს. იგრძნობა თუ არა იგივე ვარჯიშების დროს?

ო, დიახ. ის ასეთი ადამიანია. ვან გაალს კლუბში მოსვლის პირველივე დღიდან, ფეხბურთელები კარგად ექცევიან, სამწვრთნელო შტაბი შესანიშნავად მუშაობს. ის ასეთ დონეზე მუშაობას ძალიან შეესაბამება. ვან გაალმა იცის, რას აკეთებს.

უეინ რუნი, დავიდ დე ხეა... შეამჩნიეთ ამ ფეხბურთელების თამაშში ცვლილება?

ისინი ყოველთვის დიდებულად თამაშობდნენ და გუნდს სარგებელს აძლევდნენ. დავიდი ერთი მეორის მიყოლებით გვშველის, უაზა მუდმივად იტანს. ჩემთვის არაფერი შეცვლილა - ორივე მათგანი დიდებული ფეხბურთელია, ჩვენი გუნდისთვის ძალიან მნიშვნელოვანები.

თვლით თუ არა "იუნაიტედს" ტიტულის პრეტენდენტად?

არ ვიცი. თითოეულ თამაშში უნდა გავაგრძელოთ გამარჯვების მოპოვება და ქულების დაგროვება. ვფიქრობ, შობის შემდეგ ამ საკითხს ისევ მივუბრუნდებით და ვნახავთ, როგორ განვითარდება მოვლენები.

"მანჩესტერ იუნაიტედში" გატარებულ დროს როგორ აღწერთ?

მიუხედავად ტრავმებისა, მიმაჩნია, რომ ბევრ რამეს მივაღწიე. ჩვენ მოვიგეთ პრემიერ ლიგა, გავიმარჯვეთ მნიშვნელოვან მატჩებში, ვითამაშეთ ჩემპიონთა ლიგაზე. ამიტომ, "ბლექბერნში" რომ ეთქვათ ასეთი რამ გელოდებაო, უბრალოდ გამეცინებოდა. არ მიმართლებს, მაგრამ ფორმაში მალე უნდა შევიდე და ძირითად შემადგენლობას დავუბრუნდე.

ტრავმებზე ხშირად ფიქრობთ?

არა, მე ყოველთვის წინ ვიყურები, მომავალში ვიხედები. ვერაფერი მაიძულებს გზიდან გადახვევას. მე მაქსიმალურად ვარ ფოკუსირებული და გამარჯვებებს ვესწრაფვი. არ განვეკუთვნები მათ რიგებს, ვინც ნებდება.



წყარო: carrick.ru