მარუან ფელაინი აცხადებს, რომ გასულ წელს "მანჩესტერ იუნაიტედის" მაჩვენებლების შედეგად "ჯოხი მასზე გადატყდა".

27 წლის ფეხბურთელი "ოლდ ტრაფორდზე" 34 მლნ. ევროს სანაცვლოდ "ევერტონიდან" გადავიდა და ახალ გუნდში წარმატებული თამაშის გაგრძელება უჭირდა.

"გასულ წელს გუნდურად კარგად ვერ ვთამაშობდით და კლუბის გარეთ მყოფი ადამიანებისთვის ადვილი იყო ყველაფრის ჩემზე გადაბრალება, რადგან მწვრთნელმა მე მომიყვანა, თუმცა სწორედ ამას უნდა გავმკლავებოდი."

"ეს რთული პერიოდი იყო, რადგან ჩემ კარიერაში მანამდე ასეთი რამ არასდროს გამომეცადა."

"ბევრი რამ ვისწავლე. რა თქმა უნდა მაინტერესებს, რას ამბობს ხალხი, მაგრამ უფრო მეტად შეშფოთდა ჩემი ოჯახი, დედა, მამა და ძმა, რადგან როცა ხალხი ცუდ რამეებს ამბობს ჩემზე, მათთვის ძალიან რთულია."
- განაცხადა ფელაინიმ.

"იუნაიტედის" დატოვების შემდეგ დევიდ მოიესი "რეალ სოსიედადში" გადავიდა და ფელაინის სჯერა, რომ შოტლანდიელი წარმატებას მიაღწევს.

"მან "იუნაიტედში" წარმატებას ვერ მიაღწია, მაგრამ ეს არ ნიშნავს, რომ მას ამის უნარი არ აქვს."


დევიდ მოიესმა გუნდი 10 თვიანი მუშაობის შემდეგ დატოვა და "იუნაიტედი" სეზონის ბოლოს მე-7 ადგილზე გავიდა.

თუმცა ლუი ვან გაალის ხელმძღვანელობის ქვეშ გუნდი ახლა მესამე ადგილზე იმყოფება და ფელაინის სჯერა, რომ ოთხეულში მოხვედრა მინიმალური მიზანი იქნება.

"გასული სეზონი "მანჩესტერ იუნაიტედისთვის" ცუდი გამოდგა."

"ეს ვიცით და ბევრს ვმუშაობთ მის გამოსასწორებლად. ჯერ კიდევ ადრეა ტიტულზე საუბარი, რადგან ჯერ მხოლოდ დეკემბერია, მაგრამ ჩვენ მატჩებს ვიგებთ და როცა ასე ხდება, შენში თავდაჯერებულობა მატულობს."

"ჩვენ მინიმუმ ოთხეულში უნდა მოვხვდეთ. ეს აუცილებლად უნდა გავაკეთოთ. ასეთი გამოწვევა მსურს." - დაამატა ფელაინიმ.

წყარო: goal.com