ახალი სეზონი შესანიშნავად დაიწყო დავიდ დე ხეასთვის, ესპანელმა უკვე მრავალჯერ მოახერხა პუბლიკის გაოცება საოცარი სეივებით. მისი თამაში უყურადღებოდ არც კლუბის კაპიტანს დაუტოვებია, რომელიც აცხადებს, რომ დე ხეა მსოფლიოს ნომერ პირველი კიპერია.

დევიდმა მნიშვნელოვანი წვლილი შეიტანა გასულ კვირას "ლივერპულის" დამარცხებაში, ასევე რამდენიმე მნიშვნელოვანი ქულა გადაარჩინა "ევერტონთან", "არსენალთან" და "სტოკთან" მატჩებში.

მიუხედავად იმისა, რომ ამჟამად "ოქროს ბურთის" სამ ძირითად კანდიდატს შორის ერთადერთი მეკარე მანუელ ნოიერია, უეინ რუნი თვლის, რომ დე ხეა მსოფლიოს მასშტაბით საუკეთესოა.

"ჩემი აზრით, ის მსოფლიოს საუკეთესო მეკარეა. მან ჩვენი გუნდის რიგებში უამრავი საოცარი მატჩი ჩაატარა" - განაცხადა რუნიმ.

"ის არ არის ისეთი მაღალი, როგორც ზოგი სხვა მეკარე, თუმცა მას საოცარი ნახტომი აქვს და ყოველ წერტილს აკონტროლებს. ზოგჯერ ვარჯიშზე არტყამ კარში და ბრუნდები, რადგან ფიქრობ რომ გოლი გავიდა, თუმცა ბურთი მის ხელებში აღმოჩნდება. მისით ძალიან კმაყოფილები ვართ."

დე ხეა "იუნაიტედს" 2011 წელს, 20 წლის ასაკში შეუერთდა და ლეგენდარული ედვინ ვან დერ სარი ჩაანაცვლა. მისი პირველი 18 თვე არც ისე წარმატებული გამოდგა, თუმცა გასულ წელს მან "იუნაიტედის" წლის საუკეთესო ფეხბურთელის წოდება მიიღო.

"ძალიან რთულია 20 წლის ასაკში "იუნაიტედის" ძირითადი მეკარე იყო, თან როდესაც ისეთი ფანტასტიური მეკარის ჩანაცვლება გიწევს, როგორიც ვან დერ სარია."

"ჩვენ ვიცოდით, რომ მას თავიდან დრო დასჭირდებოდა და ასეც მოხდა. პირველი 6 თვე, შესაძლოა ერთი წელი, მისთვის რთული იყო, თუმცა ის აგრძელებდა ბეჯითად მუშაობას და შედეგი სახეზეა."

"ედვინ ვან დერ სარს საუკეთესო წლები ჰქონდა "იუნაიტედში", როდესაც ის 30 წელს გადაცილებული იყო, ამიტომ დავიდს ჯერ კიდევ დიდი დრო აქვს წინ. თუ ის ასევე გააგრძლებს მუშაობას, იგი მრავალი წლის განმავლობაში დარჩება ტოპ მეკარედ."

"დავიდი ახლა შესანიშნავ ფორმაში იმყოფება და იმედი მაქვს რაიმე პერსონალური ჯილდოს აღებასაც მოახერხებს."

ვან დერ სარის გარდა, რუნის კიდევ ერთ მეკარესთან, ჯო ჰარტთან აქვს ნათამაშები ეროვნულ ნაკრებში. "ისინი სრულიად განსხვავებული არიან. სამივე შესანიშნავი მეკარეა. იმ სტილით, რითაც "იუნაიტედი" თამაშობს, მეკარე ხშირად ერთვება თამაშში და უწევს ფეხის გამოყენება, რასაც დავიდი და ედვინი შესანიშნავად აკეთებენ. ჯო განსხვავებულია, თუმცა ის დიდ დახმარებას უწევს "მანჩესტერ სიტის" და ეროვნულ ნაკრებს"

მიმდინარე სეზონში ტრავმების გამო დე ხეას ხშირად უწევს განსხვავებულ დაცვის ხაზთან ერთად თამაში, რუნის აზრით ეს მის საქმეს კიდევ უფრო ართულებს.

"რა თქმა უნდა მეკარეს ურჩევნია, რომ მის წინ ჩამოყალიბებული დაცვის ხაზი იყოს, მაგრამ ის ახლანდელ სიტუაციას უნდა შეეგუოს. ამ სეზონში გუნდში უამრავი ტრავმაა, რაც სიტუაციას ართულებს, თუმცა დავიდი ყველაფერს შესანიშნავად ართმევს თავს."

"ადრინდელისგან განსხვავებით დე ხეა უფრო ხშირად კონტაქტობს მცველებთან. როცა ის პირველად მოვიდა აქ ინგლისური კარგად არ იცოდა და ურთულდებოდა მცველებისთვის დავალებების მიცემა, თუმცა ახლა ის უფრო ხშირად ყვირის."

წყარო: ESPN