"მანჩესტერ იუნაიტედის" კაპიტანი, უეინ რუნი თვლის, რომ მის გუნდს ტიტულის მოპოვება მიმდინარე სეზონში ჯერ კიდევ შეუძლია.
გასულ წელს "იუნაიტედმა" სეზონი მე-7 ადგილზე დაასრულდა და ჩემპიონ "სიტის" 22 ქულით ჩამორჩა. "წითლებს" არც მიმდინარე სეზონი დაუწყიათ კარგად, მაგრამ ბოლო ტურებში რამდენიმე წარმატებას მიაღწიეს და ცხრილში მესამე ადგილზე იმყოფებიან.
რუნის მიაჩნია, რომ მის გუნდს "ჩელსისთან" და "სიტისთან" ბრძოლა შეუძლია.
"ვფიქრობ, უნდა გვჯეროდეს, რომ ტიტულის მოგება შეგვიძლია. "ჩელსის" რვა ქულით ჩამოვრჩებით და სეზონის გადატვირთულ ნაწილს ვუახლოვდებით, ამიტომ თუ მოვახერხებთ და ყველა მატჩს მოვიგებთ, ხოლო სხვები ქულებს დაკარგავენ, შეუძლებელი არაფერი იქნება."
"ჯერ კიდევ ადრეა ამის თქმა, მაგრამ შედეგები მოდის, ხოლო მწვერვალამდე მანძილი მხოლოდ 8 ქულას შეადგენს, ამასთან ერთად წინ ჯერ კიდევ მრავალი მატჩია. ვფიქრობ, შობა ძალიან მნიშვნელოვანი პერიოდი იქნება ჩვენთვის."
"ორი წლის წინ ჩემპიონობა მოვიპოვეთ, მაგრამ მთელ რიგ მატჩებში ცუდად გამოვიყურებოდით, თუმცა შედეგს მივაღწიეთ და ხანდახან ეს საჭიროა."
"მიმდინარე სეზონში რამდენიმეჯერ ვნახე, როგორ ცუდად თამაშობდა "ჩელსი", მაგრამ შედეგს მაინც აღწევდა. უბრალოდ გვჭირდება სწორი შედეგების მიღწევა და შემდეგ ყველანი დავრწმუნდებით, რომ შემდეგშიც შევძლებთ მატჩების მოგებას."
"ჩვენ ბევრი ისეთი ფეხბურთელი გვყავს, რომელთაც მე, კერიკს და ფლეთჩერს გამოცდილებას ვუზიარებთ, აქ ხომ დიდი ხანია ვიმყოფებით."
"მატჩების მოგება უნდა გავაგრძელოთ. იმედი მაქვს, მწვერვალზე დაბრუნებას მოვახერხებთ და მერე ვინ იცის."
"შესანიშნავი მედგრობა ვაჩვენეთ. ზოგი შეხვედრა ისე არ მიმდინარეობს, როგორც ეს გვსურს, მაგრამ ჩვენ მათ ვიგებთ და ეს შესანიშნავი ხასიათია." - განაცხადა უეინ რუნიმ.