"ეშმაკების" ყოფილი მწვრთნელი, რენე მალესტინი, Sky Sports-თან ინტერვიუში აცხადებს, რომ წითლები არ უნდა ჩამოიწერონ, რადგან მათ შესწევთ ძალა ტიტულისთვის იბრძოლონ. ჰოლანდიელი სპეციალისტის აზრით, ზედიზედ ოთხი გამარჯვება ამტკიცებს იმას, რომ გუნდმა გაითავისა ვან გაალის ფილოსოფია და მზად არიან წინსვლისთვის.

"ეს არის სწორედ ის, რასაც ყველა ელოდა ძირითადად კი სამწვრთნელო შტაბი - რამდენიმე მოგება ზედიზედ და ისინი კარგადაც გამოიყურებოდნენ.

ჯერ კიდევ არაფერია დაკარგული, მეტიც, შემიძლია ვთქვა, რომ ჩემპიონობაზე საუბარი ნაადრევია. "ჩელსისთან", რომელიც ძალიან ძლიერი გუნდია, სხვაობის შესამცირებლად საფუძველი უკვე არსებობს, თანაც საკმაოდ მყარი. ჯერ შობაც არ დამდგარა, ყველაფერი კი აპრილში იქნება ცნობილი.

ყოველ დღე უფრო თვალსაჩინო ხდება, რას ითხოვს ლუი ფეხბურთელებისგან და როგორ სტილს სთავაზობს იგი მოწინააღმდეგეს. პრეს-კონფერენციებზე შეგიძლიათ გაიგოთ, რომ ის არ არის კმაყოფილი, როდესაც გუნდი იმარჯვებს.

"სტოკის" წინააღმდეგ ძალიან მნიშვნელოვანი იყო მატჩის მიწურულს თავის დაცვა, რაც მათ მოახერხეს. ახლა ორი დიდი მატჩი გველის "საუთჰემტონისა" და "ლივერპულის" წინააღმდეგ, რომლებიც აუცილებლად უნდა მოიგონ."

რენე მოხიბლულია მარუან ფელაინის თამაშით და თვლის, რომ ბელგიელის კარგი ფორმა ძალიან წაადგება გუნდს, სეზონის დარჩენილ მონაკვეთში.

"გუშინ თქვენ ნახეთ ფელაინის საუკეთესო თამაშის გამომჟღავნება, როდესაც ის საჯარიმოში შეიჭრა და გოლი გაიტანა. ის ძლიერი და მაღალია. მარკ ჰიუზი ნამდვილად არ იყო ბედნიერი, როდესაც მის მცველებს ასეთი ფეხბურთელის წინააღმდეგ უნდა ეთამაშათ, თუმცა ვერაფერი შეცვალა.

საშინელი გასული სეზონის შემდეგ, ბელგიელისთვის ყველაფერი მშვენივრად მიდის. მან კვლავ დაიბრუნა თავდაჯერება და აგრძელებს კარგი თამაშის ჩვენებას."

ჰოლანდიელს არც დავიდ დე ხეას შექება დავიწყნია:

"დღესდღეობით დავიდი "იუნაიტედისთვის" ყველაზე მნიშვნელოვანი მოთამაშეა. მან რამდენიმე საოცარი სეივი განახორციელა, ჩვენ ყოველთვის დარწმუნებული ვიყავით მის ძალებში, ამიტომ არ მიკვირს მისი წარმატება."

წყარო: carrick.ru