"მანჩესტერ იუნაიტედის" ახალგაზრდა ფეხბურთელი აცხადებს, რომ არ არსებობს უკეთესი გაკვეთილი, ვიდრე მსოფლიო კლასის ფეხბურთელების, რადამელ ფალკაოს, უეინ რუნისა და რობინ ვან პერსისთან ერთად ვარჯიში.
ჩრდილოირლანდიელი მცველი სეზონის წინ უორენ ჯოისის 21 წლამდელთა გუნდში თავის დამკვიდრებას ცდილობდა, მაგრამ მას შემდეგ მან 6 თამაში ჩაატარა "იუნაიტედის" პირველ გუნდში.
შესაბამისად იგი ვარჯიშებზე მსოფლიოს ერთ-ერთი ყველაზე გამორჩეული თავდამსხმელების წინააღმდეგ ირჯება, რასაც დადებითად მიიჩნევს.
"თავდაჯერებულობისთვის რთულია, მაგრამ ჩემთვის კარგი. მსოფლიო კლასის თავდამსხმელების გვერდით ყოველდღიურმა თამაშმა მხოლოდ უკეთეს მცველად ჩამოყალიბებაში უნდა დამეხმაროს."
"მოუთმენლად ველოდები სეზონის გაგრძელებას და ყოველ დღე გაუმჯობესებას ვცდილობ. მათი გოლის გატანის შედეგები თავისთავად მეტყველებს ყველაფერზე, ასე რომ თუ ვარჯიშებზე მათ გაჩერებას შევძლებ, ე.ი. სწორად ვაკეთებ რაღაცას."
ტრიოს გარდა მაკნეირი ჯეიმს უილსონის წინააღმდეგაც თამაშობს.
"ოჰ, ის დიდებულია. ვფიქრობ, მას ყველაფერი აქვს. არ არსებობს ისეთი რამ, რისი გაკეთებაც მას არ შეუძლია. "ოლდ ტრაფორდზე" მისი პირველი ჰეთ-თრიკის შესრულება მხოლოდ დროის საკითხია! ის ბეჯითად მუშაობს და მის წინააღმდეგ ვარჯიშზე თამაში დიდი გამოწვევაა."