"მანჩესტერ იუნაიტედის" აღმასრულებელმა დირექტორმა, ედ ვუდვორდმა რამდენიმე დღის წინ განაცხადა, რომ მისი კლუბი ზამთრის ხარჯზე პრობლემებთან გამკლავებას არ ეცდება.
ეს სიტყვები აღქმული იქნა, თითქოს "იუნაიტედი" ტრანსფერის განხორციელებას არ აპირებდეს, მაგრამ ვან გაალს ვუდვორდის ნათქვამის შინაარსი თავისებურად ესმის.
"არ ვფიქრობ, რომ მან იგულისხმა არავის ვიყიდითო. ჩემი აზრით მას მხედველობაში ჰქონდა ის, რომ იანვარში ძალიან რთულია "მანჩესტერ იუნაიტედის" დონის ფეხბურთელის შეძენა და ამის გამო არავის დავიმატებთ, რაშიც ვეთანხმები."
"როცა ვინმეს ყიდულობ, ის გუნდში არსებულ მოთამაშეებზე უკეთესი უნდა იყოს და ასეთი ფეხბურთელის იანვარში პოვნა ძალიან რთული იქნება. მჯერა, რომ სწორედ ამის თქმა უნდოდა მას და ისიც მჯერა, რომ ერთსა და იმავე ენაზე ვმეტყველებთ."
"მანჩესტერ იუნაიტედი" დიდი ხნის განმავლობაში ინტერესდება "რომას" ნახევარმცველით, კევინ სტროოტმანით, თუმცა ამ საკითხთან დაკავშირებით ვან გაალი არავითარ კონკრეტულ კომენტარს არ აკეთებს.
"მედიას ვერ ვეტყვი იმ ფეხბურთელების შესახებ, რომელთა ყიდვა გვსურს. კითხვებს ვერ ვუპასუხებ და არა მარტო სტროოტმანის თაობაზე, არამედ მსოფლიოს ნებისმიერი ფეხბურთელის შესახებ."