"მანჩესტერ იუნაიტედი" შესაძლოა 4 კვირის განმავლობაში ნომერ პირველი მეკარის გარეშე იყოს, თუკი დე ხეას ტრავმა სერიოზული აღმოჩნდება. შეგახსენებთ, რომ ესპანელმა კარის დარაჯმა ეროვნულ ნაკრებში ვარჯიშისას ნეკა თითი დაიზიანა.

"ბარსელონას" ყოფილი გოლკიპერი ვიქტორ ვალდესი, რომელიც ტრავმის შემდგომ სარეაბილიტაციო კურსს კარინგტონში გადის, ჯერ კიდევ არ არის ოპტიმალურთან მიახლოებულ ფორმაში, ამიტომ წითლების ხელმძღვანელობა არ ჩქარობს მასთან კონტრაქტის გაფორმებას.

ეს ყველაფერი კი ნიშნავს იმას, რომ "არსენალთან" გასამართ შეხვედრაში "ეშმაკების" კარს დანიელი ანდერს ლინდეგაარდი დაიცავს, რომელსაც პრემიერ ლიგაში 5 აპრილის შემდეგ არ უთამაშია, როდესაც მისმა გუნდმა "ნიუკასლი" გასვლაზე 4-0 დაამარცხა.

დავიდ დე ხეას, რომელიც ერთ-ერთი ყველაზე სტაბილური მოთამაშეა "იუნაიტედში", მხოლოდ 1 წლიანი კონტრაქტი აკავშირებს კლუბთან და ზაფხულში თავისუფალი აგენტი ხდება, წითლები ყველანირად ეცდებიან ესპანელის ახალ კონტრაქტზე დათანხმებას, წინააღმდეგ შემთხვევაში დავიდი დიდი ალბათობით "მადრიდის რეალს" შეუერთდება. იმის გათვალისწინებით, რომ ესპანელის მომავალი ჯერ კიდევ უცნობია, მანკუნიანელთა სამწვრთნელო შტაბი აპირებს კიდევ ერთ ესპანელ კიპერს, ვიქტორ ვალდესს გაუფორმოს კონტრაქტი, თუმცა როგორც უკვე ავღნიშნეთ ვიქტორი ჯერ კიდევ შორსაა ოპტიმალური ფორმისგან.

წყარო: mirror.co.uk