პირველ ნაწილში ჩვენ "იუნაიტედის" დაცვის ხაზზე, მის სისუსტეებსა და პლუსებზე ვილაპარაკეთ, ახლა კი მოედნის ცენტრში მყოფი ფეხბურთელების შეფასების და ვერდიქტის გამოტანის დროა.

ზაფხულის სატრანსფერო ფანჯრის დროს აქტიურობამ და ფულის ხარჯვამ ისეთ ფეხბურთელებზე როგორებიც არიან: ანხელ დი მარია, დეილი ბლინდი და ანდერ ერერა, ჰოლანდიელ სპეციალისტს ცხოვრება გაუადვილა და დიდი არჩევნის საშუალება მისცა. თუმცა ტრავმებმა რადიკალურად შემოუტრიალეს საქმე ვან გაალს. სეზონის სტარტზე კერიკისა და ფელაინის ტრავმის მიუხედავად, ვან გაალმა მაინც შეძლო სასურველი შემადგენლობის გამოყვანა ნახევარდაცვაში.

ფლანგები

როგორც უკვე ავღნიშნეთ, ლუი ვან გაალს ძალიან დიდი არჩევანი აქვს ნახევარდაცვაში და ეს ეხება ყველა პოზიციას. ეს აძლევს სპეციალისტს საშუალებას მატჩამდე და მისი მიმდინარეობისას კორეკტივები შეიტანოს გუნდის თამაშში. ფლანგებზე ძალიან ცოცხალი და სწრაფი ფეხბურთელები არიან: ანხელ დი მარიასა და ადნან იანუზაის სახით, რომლებსაც შეტევის ორივე მხარეს თამაში შეუძლიათ და ეს ერთი-ორად ართულებს მეტოქის ამოცანას.

ანხელ დი მარია საწყის ტურებში შესანიშნავად გამოიყურებოდა და ნამდვილად ამართლებდა მასზე გაცემულ ავანსებს, 5 მატჩში მან 3 გოლი გაიტანა და ამასთან საგოლე გადაცემებიც უხვად ჩამოარიგა. ბევრის აზრით სწორედ ეს ხასიათი და გამარჯვებულის მენტალიტეტი აკლდა "იუნაიტედს" რონალდოს წასვლის შემდეგ. თუმცა ეს მხოლოდ საწყისი იყო, ამის შემდეგ ანხელის შედეგიანობამ მნიშვნელოვნად იკლო და ლუი ვან გაალს ისღა დარჩენია იმედოვნოს, რომ მისი შეგირდი სანაკრებო პაუზის შემდეგ ჩვეულ ფორმას დაიბრუნებს.

ახალგაზრდა ადნანი ერთადერთი ნათელი წერტილი იყო დევიდ მოიესის დროს, თუმცა ბელგიელმა ვერ შეძლო ჰოლანდიელის გაოცება, რის გამოც რამდენჯერმე სარეზერვო გუნდში გადასვლაც მოუწია. ამის გამო თინეიჯერს ყურები არ ჩამოუყრია და ძალას არ იშურებდა ახალგაზრდულ გუნდშიც კი. მას შრომა დაუფასდა და ბოლო 4 თამაშში პირველი გუნდის ძირითად მოთამაშედ ჩამოყალიბდა.

რაც შეეხება ანტონიო ვალენსიას, ის ჯერ კიდევ საუკეთესო ფორმის ძიებაშია, თუმცა ნაკლებად ეძლევა საშუალება თავი წარმოაჩინოს თავის პოზიციაზე, რადგან მოთამაშეთა არყოფნის გამო ბოლო რამდენიმე მატჩია განაპირა მცველად უწევს თამაში.

როგორც მოგეხსენებათ ლუიშ ნანი არენდის წესით არის გასხვისებული და მშობლიურ "სპორტინგში" ასპარეზობს. კიდევ ერთი ვინგერი, ინგლისელი ეშლი იანგი ნამდვილად არ შედის ვან გაალის გეგმებში, რადგან ბრიტანელის თამაში კრიტიკას ვერ უძლებს.

ვან გაალის მთავარი ამოცანაა სანაკრებო შესვენების შემდეგ არგენტინელი ანხელ დი მარია "რელსებზე" დააბრუნოს და ძველებურად აათამაშოს, რადგან გასული ჩემპიონთა ლიგის ფინალის საუკეთესო ფეხბურთელს ნამდვილად შესწევს ძალა, თუკი ჯამრთელად იქნება, წითლები ჩემპიონთა ლიგაზე დააბრუნოს.

შეფასება: 6/10

ცენტრალური ზონა

ის თუ ვის აირჩევდა და გაამწესებდა ამ პოზიციებზე ლუი ვან გაალი არჩევანში შეზღუდული რომ არ ყოფილიყო, სადაო საკითხია, რადგან თითქმის მატჩი არ გავა, რომ ერთი ცენტრალური ნახევარმცველი მაინც არ აკლდეს "იუნაიტედს" ტრავმების გამო.

მაიკლ კერიკის ტრავმას, რომელიც ინგლისელმა წინასასეზონო ტურნეზე მიიღო, ნამდვილად არ გაუხარებია გუნდის თავკაცი, რადგან როგორც ჩანს "ერთგული ჯარისკაცი" მის გეგმებში შედიოდა, თუმცა არავინ იცის ვინ იქნებოდა მისი იდეალური პარტნიორი.

დეილი ბლინდი ნამდვილად ერთ-ერთი გამორჩეული ფიგურაა დღევანდელ "იუნაიტედში". მისი სტაბილურობა და დამაჯერებლობა დაფასებას იმსახურებს, თუმცა 13 მილიონ ფუნტად შეძენილმა ჰოლანდიელმა მსოფლიო ჩემპიონატზე აჩვენა, რომ მისთვის საუკეთესო პოზიცია მარცხენა მცველობაა.

ანდერ ერერამ, რომლის შეძენაც ჯერ კიდევ დევიდ მოიესის დროს იგეგმებოდა, ვერადავერ მოიკიდა ფეხი ძირითადში ზურგის დაზიანების შემდეგ, მეტიც, ბოლო 4 თამაშში სტაბილურად სათადარიგოთა სკამს არ ტოვებს. გულშემატკივარი მას ახალ პოლ სქოულზსაც კი უწოდებდა და ამის საბაბს მათ ტურნეზე ანდერის ძალიან კარგი თამაში აძლევდა, მას მართლაც დიდი პოტენციალი აქვს და შეუძლია ერთ-ერთი წამყვანი მოთამაშე გახდეს.

კიდევ ერთი ესპანელის ბედი ჯერ კიდევ ბურუსით არის მოცული. მატა, რომელსაც ვან გაალის მოწაფემ კარისკენ მიუთითა, ვერც "იუნაიტედის" შემადგენლობაში გახდა პლეიმეიკერის პოზიციაზე ნომერ პირველი არჩევანი. 3 გოლი, მათგან ერთი გამარჯვების მომტანი "ლესტერთან", - თითქოს მყარი არგუმენტია არა? თუმცა ლუი მაინც რუნის ამჯობინებს 10-იანზე.

მივიწყებული ბელგიელი ნახევარმცველის პერფორმანსმა სასიამოვნოდ გააკვირვა წითლების თავკაცი და ბევრ გულშემატკივარსაც გაუღვივა იმედის ნაპერწკალი. მარუანმა როგორც იქნა გაიტანა სადებიუტო გოლი და საკმაოდ კარგადაც გაისარჯა ბოლო შეხვედრებში.

კერიკის დაბრუნებამ კიდევ უფრო გაუადვილა საქმე და უდრო დიდი არჩევანი მისცა ვან გაალს. ვნახოთ ვინ გახდება მისი ძირითადი წყვილი მოედნის ცენტრში.

შეფასება: 6/10

წყარო: M.E.N