ხუან მატა აცხადებს, რომ იგი ყველა შანსის გამოყენებას ეცდება, რათა ლუი ვან გაალის გუნდში ადგილი დაიმკვიდროს.
ანხელ დი მარიასა და რადამელ ფალკაოს მოსვლის შემდეგ ხუან მატამ სათადარიგოთა სკამზე გადაინაცვლა.
მატას მიმდინარე სეზონში სამი გოლი აქვს გატანილი, რომელთაგან ერთ-ერთი "კრისტალ პალასთან" გამარჯვების მომტანი აღმოჩნდა.
"როგორც ყველა გუნდში ხდება, მწვრთნელი არის ერთადერთი ადამიანი, ვინც გადაწყვეტილებას იღებს, თუ ვინ ითამაშოს."
"ყველაფერი, რაც ჩვენ უნდა გავაკეთოთ არის ის, რაც მე გავაკეთე "პალასთან" - უნდა გამოვიყენოთ ყველა შანსი და გუნდის დახმარებას ვეცადოთ."
"საბედნიეროდ, შაბათს ჩემი გოლი სამი ქულის მომტანი აღმოჩნდა."
"ეს ემოციების აფეთქებას ჰგავდა, რადგან რთული შეხვედრა გამოვიდა და რამდენიმე მატჩის განმავლობაში გამარჯვებას ვერ ვახერხებდით. ძალიან ბედნიერი ვარ."
ლუი ვან გაალის გუნდმა სეზონი წარუმატებლად დაიწყო და ამჟამად მხოლოდ მე-7 პოზიციაზე იმყოფება.
"ამ სეზონში გვქონდა კარგი შედეგებიც და ნაკლებად კარგი შედეგებიც, მაგრამ ჩვენ უკანასკნელი თამაშიდან დადებითი ემოცია წამოვიღეთ."
"ამის მიზეზი კი რამდენიმე ფაქტორია. სამწუხაროდ, ყველა ფეხბურთელზე არ მიგვიწვდებოდა ხელი."
"მოვლენები ისე არ განვითარდა, როგორც გვსურდა, მაგრამ იმედი მაქვს "კრისტალ პალასთან" გამარჯვება გარდამტეხი იქნება და რეგულარულად მოვახერხებთ გამარჯვებების მოპოვებას."