"მანჩესტერ იუნაიტედის" ყოფილ მთავარ მწვრთნელს, დევიდ მოიესს მიაჩნია, რომ მარუან ფელაინი მასში გადახდილი 27.5 მილიონი ფუნტის გამართლებას იწყებს.

ფელაინის სადებიუტო სეზონი "ოლდ ტრაფორდზე" ცუდი გამოდგა, თუმცა დევიდი ამას თავისებურ ახსნას უძებნის.

"ისევე როგორც "ევერტონის" მიერ ფელაინის შეძენის დროს, მარუანი ახლაც სატრანსფერო ფანჯრის მიწურულს შეუერთდა "იუნაიტედს". მაგრამ, რა თქმა უნდა არ ვაპირებდით, რომ ის ჩვენი ერთადერთი შენაძენი ყოფილიყო იმ წელს. მარუანი გუნდის შესავსებად ვიყიდეთ და იმედი გვქონდა, რომ სხვა ფეხბურთელებსაც გადავიბირებდით, რომლებიც კონკრეტულ მატჩებში გარკვეულ როლს შეასრულებდნენ."

"მარიანისდა სამწუხაროდ, იგი სეზონის ერთადერთი ახალწვეული გახდა, ამიტომ მისი ტრანსფერი დიდ შენაძენად ჩანდა. ეს კი ნიშნავდა იმას, რომ მარუანი ისეთ ზეწოლას განიცდიდა, როგორიც მანამდე არასდროს ეგრძნო. სეზონის წარუმატებლად დაწყების შემდეგ ხალხი მას თვალს არ აცილებდა, მიუხედავად იმისა, რომ ძირითადი ყურადღება ჩემზე იყო გადმოტანილი."

"მარუანისთვის დროის მიცემა ღირდა, რადგან ახლა ის ამტკიცებს იმას, რისიც მუდამ მჯეროდა - ფელაინი "იუნაიტედის" მნიშვნელოვანი ფეხბურთელი გახდება. უკანასკნელ ორ შეხვედრაში, რომელიც მე ვნახე, ის შესანიშნავად გამოიყურებოდა. იგი ისევე ახდენდა გუნდის თამაშზე გავლენას, როგორც ამას დიდი ფეხბურთელები აკეთებენ. ვფიქრობ, მან უდიდესი როლი იქონია დღევანდელ დერბიში "იუნაიტედის" ამაღლებულ განწყობაზე."

"გასულ წელს იყო დრო, როცა საქმე რთულად მიდიოდა. მას ვუთხარი, რომ თუ მუშაობას გააგრძელებდა, "იუნაიტედის" წამყვანი ფეხბურთელი გახდებოდა."

"ფელაინის მოედანზე მრავალი სახის სამუშაოს გაწევა შეუძლია, მაგრამ მიმაჩნია, რომ დეილი ბლინდის მსგავს ფეხბურთელთან ერთად ნახევარდაცვის ცენტრში ყოფნა მისთვის სასარგებლო იქნება, რადგან დეილი დაცვით ფუნქციებს შეითავსებს. "სტანდარტში" მას დეფური, ან ვიტსელი ჰყავდა, რომლებიც მჭიდროდ დგებოდნენ და მას წინ წასვლის საშუალებას აძლევდნენ. "ევერტონში" ასეთი ფეხბურთელი ფილ ნევილი გახლდათ."

"გასულ წელს "იუნაიტედს" ასეთი სტილის ფეხბურთელი აკლდა და მიუხედავად იმისა, რომ მარუანი ფიზიკურად ძლიერია, ის გაცილებით კარგად თამაშობს, როცა მას საყრდენი ნახევარმცველი ეხმარება."

"ამიტომაც, მიხარია, რომ გუნდს შეეგუა და მის დაფასებას იწყებენ. ის ძალიან კარგი ფეხბურთელია, რომელიც იმდენ მცდელობას და ფულს ღირდა." - განაცხადა მოიესმა.

წყარო: fapl.ru