მარკოს როხო და ანხელ დი მარია პირველი მანჩესტერული დერბის მოლოდინში არიან და მათი განცხადებით ისინი მზად არიან კვირის მატჩში მოსალოდნელი დაძაბულობისთვის.
არგენტინელი ფეხბურთელები "მანჩესტერ იუნაიტედის" საქალაქო ფონდის ღონისძიებაზე თანამემამულე საბალეტას შეხვდნენ.
"რა თქმა უნდა ერთმანეთს მივესალმებით და ხელს ჩამოვართმევთ. ძალიან გვიხარია, რომ მანჩესტერში ერთმანეთის სახით კარგი მეგობრები გვყავს. როცა არგენტინის ფარგლებს გარეთ იმყოფები, კარგია რომ მეგობრები გყავს. მაგრამ მატჩის დროს ეს მეგობრობა მეორე პლანზე გადადის, რადგან ყველაფერი მაისურზეა დამოკიდებული. ისინი "ცისფერები" არიან, მე კი "წითელი" ვარ და ჩვენი მეგობრობა მატჩის მსვლელობისას შეწყდება. მაგრამ მოედანს გარეთ მათთან ურთიერთობა მახარებს."
"დერბი ყოველთვის დაძაბული გამოდის, რადგან ქალაქის ორ გუნდს შორის დიდი პაექრობაა. ისინი მონდომებულნი არიან და მგზნებარე ატმოსფეროს ქვეშ თამაშობენ, რასაც ქომაგები და სტადიონი ქმნის. იმედი მაქვს, კვირას ბედნიერები დავბრუნდებით." - განაცხადა დი მარიამ.
დი მარიას მსგავსად მარკოს როხოც ყველაფერს გააკეთებს, რათა ლუი ვან გაალის შეგირდები "ეტიჰადიდან" ბედნიერები დააბრუნოს.
"ძალიან რთულია სერხიოს წინააღმდეგ თავდაცვა. ყველასთვის ცნობილია, რამდენად სწრაფია იგი და როგორ საფრთხეს წარმოადგენს. სახიფათო პოზიციაში შესვლაში ძალიან კარგია. ძალიან ყურადღებით და დაკვირვებით უნდა უყურო მის მოქმედებას და მუდამ იცოდე სად დგას, ან სად დადგება. ეს კი მთელი 90 წუთის განმავლობაში უნდა აკეთო."
"საკვირაო შეხვედრა ძალიან მნიშვნელოვანია. გამარჯვება თავდაჯერებულობის მოპოვებაში დაგვეხმარება და ქულების დაგროვებისკენ გზას გაგვიკვალავს." - განაცხადა როხომ.