"იუნაიტედის" ყოფილი მეკარე თავისი ამჟამინდელი სამსახურის, წარსული პერიოდის და სერ ალექს ფერგიუსონის შესახებ საუბრობს.
საკლუბო შეჯიბრებების რვა თასი ჰოლანდიასა და ინგლისში, ჩემპიონთა ლიგის ორი თასი, საკლუბო მსოფლიო ჩემპიონატის გამარჯვებული - ეს არის ედვინ ვან დერ სარის 21 წლიანი კარიერის დაუჯერებელი სტატისტიკა, რომელზე შეხედვითაც მას შეუძლია ამაყი და კმაყოფილი იყოს.
თავის 43 წლის ასაკში ჯერ კიდევ ენატრება სტადიონი და სურს სარგებელი მოუტანოს გუნდს, სადაც ყველაფერი დაიწყო მისთვის.
ამჟამად ედვინი ამსტერდამის "აიაქსის" მარკეტინგის დირექტორია და ჩვენ საშუალება მოგვეცა მას ცხოვრებაზე, კარიერაზე და სერ ალექსთან ურთიერთობაზე შევკითხებოდით.
2011 წელი "იუნაიტედისთვის" ჩემპიონატში გამარჯვებით დასრულდა, მაგრამ ჩემპიონთა ლიგის ფინალი წააგეთ. მიუხედავად ამისა, მაინც წახვედი. რას აკეთებდი ბოლო სამი წლის განმავლობაში?კლასიკური გაგებით, ამას კარიერის დასრულებას ვერ დავარქმევდი. ჩემი უკანასკნელი შეხვედრის შემდეგ ინგლისში კიდევ რამდენიმე თვით გავჩერდი, შემდეგ კი ჰოლანდიაში დავბრუნდი. თავიდან მინდოდა სამწვრთნელო ხარისხის მიღება და შესაბამისი საქმით დაკავება, მაგრამ შემდეგ ამსტერდამის აკადემიაში "სპორტული მენეჯმენტის" შესწავლას მივყავი ხელი.
თამაშის კომერციული ნაწილის შესახებ ბევრი რამ გავიგე და 2012-ში დავბრუნდი კლუბში, სადაც ყველაფერი დაიწყო - ჩემს "აიაქსში". დირექტორთა საბჭომ კლუბის მარკეტინგის დირექტორის თანამდებობა შემომთავაზა.
შეგიძლია ახსნა, ზუსტად რითი ხარ დაკავებული?ჩემს ვალდებულებებში საერთაშორისო ურთიერთობების გაძლიერება, კლუბის ზოგიერთი კომერციული საქმიანობის მართვა და სპონსორებთან ერთად მოქმედება შედის. რა თქმა უნდა, ეს მკვეთრად განსხვავდება იმისგან, რასაც ფეხბურთში ბოლო ათი წლის განმავლობაში ვაკეთებდი. ადრე, უმეტესად სპორტულ კოსტიუმს ვიცვამდი, ახლა კი მაისურის, ჰალსტუხისა და პიჯაკის ტარება მიხდება.
რა სირთულეებს წააწყდი კარიერის დასრულების საწყის ეტაპზე? გენატრება ვარჯიშები, გასახდელი, ატმოსფერო?დიახ, რა თქმა უნდა! ამ დღეებისგან სიამოვნებას ვიღებდი და მთელ ძალისხმევას ვიყენებდი, რათა კარიერა რაც შეიძლება დიდხანს გამეგრძელებინა. მე უდიდეს აღიარებას მივაღწიე. მოვიგე თასები ინგლისში, იტალიასა და ჰოლანდიაში. მეტის მოთხოვნა არც კი შემიძლია. ეს არის მომენტები, რომელსაც უფრთხილდები, რომლებიც შენთან მთელი ცხოვრების განმავლობაში დარჩება.
და უცებ ეს ყველაფერი გაქრა. ბუმ! აღარ ვვარჯიშობდი, არც ფორმას ვუფთხილდებოდი, რადგან ვიფიქრე, რომ თამაში აღარ მსურდა. ზოგიერთ სპორტსმენს ხანდახან ეჭვი ეპარება შესაძლო დაბრუნებაში, მაგრამ ჩემთვის ყველაფერი დასრულებული იყო.
შეგეძლო "იუნაიტედის" შტაბს შეერთებოდი, მაგრამ "აიაქსი" აირჩიე. რატომ?"აიაქსთან" განსაკუთრებული კავშირი მაქვს. ვფიქრობ, ეს გამორჩეული კლუბია. მთელ მსოფლიოში ჩვენ საკუთარი ფილოსოფიით გავითქვით სახელი.
ახალგაზრდული აკადემია კლუბისთვის საციცოცხლო მნიშვნელობას ატარებს. ჩვენ ყოველთვის საკუთარი ფეხბურთელების აღზრდაზე ვართ ფოკუსირებულნი. დარწმუნებულები ვართ, რომ ახალგაზრდა ნიჭიერი ფეხბურთელები, რომლებიც გუნდში 8-9 წლის ასაკში ხვდებიან, საბოლოოდ გუნდის ძირითადი შემადგელობის წევრები გახდებიან.
ჩვენი ისტორია, ეს არის - მარკო ვან ბასტენი, ფრანკ რაიკარდი, პატრიკ კლუივერტი, ფრანკ და რონალდ დე ბურები, ედგარ დავიდსი, კლარენს ზეედორფი, უესლი სნეიდერი და ისეთი უცხოელები, როგორიც ლუის სუარესი და ზლატან იბრაჰიმოვიჩი არიან. ეს ყველაფერი - ჩვენი დიდებული შთამომავლობაა.
ბედნიერი ვარ აქ დაბრუნებით და პატივის მიგებით, რადგან ამ კლუბს კარიერას უნდა ვუმადლოდე. თითოეული ყოფილი ფეხბურთელი, რომელიც ჩემთან ერთად მუშაობს აქ, კლუბისთვის მადლიერების გამოხატვას ცდილობს, რომელიც ჩამოყალიბებაში დაგვეხმარა.
სერ ალექს ფერგიუსონი არაერთხელ გამოტყდა, რომ 99 წელს შენ ახლოს იყავი შმეიხელის ნაცვლად "იუნაიტედის" კარში ადგილის დაკავებასთან, მაგრამ "იუვენტუსი" აირჩიე. რატომ?ნუ, "აიაქსს" კლუბის დატოვების სურვილის შესახებ შევატყობინე. ჩემი სამსახურით რამდენიმე ევროპული გრანდი ინტერესდებოდა. როცა სერ ალექსი გამოჩნდა, "იუვენტუსთან" უკვე მიღწეული მქონდა წინასწარ შეთანხმებას.
რა თქმა უნდა "იუნაიტედში" მოგვიანებით გადავედი, მაგრამ სერ ალექსის სიტყვები იმის შესახებ, რომ ხელიდან ჩემ გაშვებას ნანობდა, ძალიან მესიამოვნა. მიუხედავად ამისა, ფერგიუსონთან 6 წლიანი მუშაობის განმავლობაში 4-ჯერ პრემიერ ლიგა და ერთხელ ჩემპიონთა ლიგა მოვიგე. კარგია, არა?
"იუვენტუსში" ძალიან ცოტა დრო გაატარე. ალბათ ამ პერიოდს აქტივში ვერ შეიყვან. როგორ ფიქრობ, რა მოხდა? გადასვლას ხომ არ ნანობ?სერია ა არ მომერგო. მეკარესა და დაცვას შორის უფრო მეტ თავისუფალ სივრცეს ვამჯობინებ, ასეთ შემთხვევაში სათამაშო პროცესში უფრო ხშირად ვერთვები.
გარდა ამისა, ვერ უარვყოფ იმ ფაქტს, რომ "იუვენტუსში" საკუთარი თამაში ვერ ვაჩვენე. ვწუხვარ, რომ ინგლისში გადასვლამდე რამდენიმე წელი დავკარგე.
მაშინაც კი, როცა "იუვენტუსი" დატოვე, რატომ აირჩიე "ფულჰემი"? ტოპ-კლუბებისგან შეთავაზება გქონდა?დიახ, ჩემით რამდენიმე გერმანული და ინგლისური ტოპ-კლუბები ინტერესდებოდნენ, მათ შორის "ლივერპულიც" (ცნობილი საფეხბურთო კოლექტივი). მინდოდა გადაწყვეტილება სატრანსფერო ფანჯრის დახურვამდე რაც შეიძლება ადრე მიმეღო, დიდი კლუბები კი როგორც წესი უკანასკნელ დღემდე იცდიან.
ამიტომაც "ფულჰემი" ავირჩიე. იმ დროს საკმაოდ ამბიციურები იყვნენ და კარგ პირობებს მთავაზობდნენ. კლუბში რამდენიმე წლით დარჩენასა და შემდეგ მაღალი დონის გუნდში გადასვლას ვგეგმავდი.
თუმცა, ცოტა მოცდა მომიხდა მანამ, სანამ ქვეყნის ყველაზე დიდებული კლუბი შემიძენდა.
როცა 34 წლის ასაკში "იუნაიტედში" გადახვედი, შეგეძლო წარმოგედგინა, რომ კიდევ 6 წელს ითამაშებდი და ეს 6 წელი შენი საუკეთესო პერიოდი იქნებოდა?რა თქმა უნდა არა. მე 2 წლიან კონტრაქტს მოვაწერე ხელი და მხოლოდ იმის იმედი მქონდა, რომ ბოლომდე ამოვწურავდი მას. შემდეგ, ალბათ ჰოლანდიაში კიდევ ერთ წელს ვითამაშებდი და 37 წლის ასაკში კარიერას დავასრულებდი. მაგრამ თავი ხელში ავიყვანე, ტრავმებს თითქმის არ ვიღებდი და "იუნაიტედის" სამწვრთნელო შტაბის დახმარებით 40 წლამდე ვითამაშე.
როცა საუბარი შენ მიერ პრემიერ-ლიგაში განვლილ პერიოდზე მიდის, გონებაში დაუჯერებელი 1311 (1311 წუთის განმავლობაში ვან დერ სარმა კარი "მშრალად" შეინახა) ტივტივდება. როგორ ფიქრობ, ვინმე შეძლებს უახლოეს პერიოდში ამ რეკორდის დამხობას?ადრე თუ გვიან მას დაამხობენ, თუმცა ვამაყობ, რომ ჯერ კიდევ ძალაშია. უფრო მნიშვნელოვანი ის იყო, რომ "მშრალი" მატჩების ასეთმა ხანგრძლივობამ იმ სეზონში ტიტული მოგვაპოვებინა. იმედი მაქვს, ჩემი რეკორდი კიდევ რამდენიმე სეზონს გასტანს.
"იუნაიტედის" გასახდელის შესახებ მოგვიყევი.ის, რაც გასახდელში ხდება - გასახდელში რჩება. (იცინის).
საუკეთესო მომენტები სერ ალექსის წამაქეზებელ სიტყვებს უკავშირდება, რომელიც გამარჯვების სურვილს გვინერგავდა.
განსაკუთრებული მომენტები დაკავშირებული იყო ასევე რომელიმე მატჩში, ან ტურნირში გამარჯვებასთან. ემოციების გამოხატვა ყოველგვარი კამერების გარეშე სრულად შეგვეძლო. განსაკუთრებულ ხალხთან ერთად გასახდელი ყოველთვის განსაკუთრებული ადგილი იქნება.
შენი კარიერის ეტაპზე არაერთხელ მიგიღია მონაწილეობა მატჩის შემდგომი პენალტების სერიაში. რამდენად განსაკუთრებული ღამე იყო მოსკოვში? მოყევი, როგორ ემზადები მსგავსი რამისთვის.დიახ, ასეთი რამ მრავალჯერ გამომიცდია. 1995-ში "აიაქსთან" ერთად მოვიგე, მაგრამ ზედიზედ სამჯერ განვიცადე მარცხი ნაკრებთან ერთად - ევრო - 96-ზე, 98 წლის მსოფლიო ჩემპიონატზე და ევრო-2000-ზე. გარდა ამისა, 1996 წელს "იუვენტუსთან" ერთად დავმარცხდი. წლებთან ერთად კი თავდაჯერებულობა დავკარგე.
თუმცა, გამოცდილებისა და გამარჯვებისადმი წადილის ხარჯზე დარწმუნებული ვიყავი, რომ მოსკოვში არ დავმარცხდებოდი.
ჯერ კიდევ მახსოვს. ანელკა ნიშნულთან მივიდა, მარჯვენა კუთხეში დაარტყა, მე სწორი მიმართულებით გადავხტი და ბურთი სახეში მომხვდა. მომდევნო 3-4 წამის განამვლობაში, სანამ ბიჭები მორბოდნენ, მთელი სამყარო მე მიყურებდა. ეს ჩემი ცხოვრების ყველაზე დაუჯერებელი მომენტი იყო!
როგორ ფიქრობ, ლუი ვან გაალი "მანჩესტერ იუნაიტედს" მოერგება? მის სტარტს როგორ შეაფასებ?მოულოდნელი დასაწყისია, ასე არ არის? ყველანი უფრო მეტ გამარჯვებას და სატურნირო ცხრილში უფრო მაღალ ადგილს ელოდებოდა, გარდა ამისა, "იუნაიტედი" ლიგის თასიდან გავარდა.
თუმცა, ლუის მეთოდებს ვენდობი და დარწმუნებული ვარ, რომ "იუნაიტედის" მდგომარეობა გამოსწორდება. ეჭვი არ მეპარება, რომ იგი "ოლდ ტრაფორდზე" წარმატებას დააბრუნებს.
დეილი ბლინდმა ამ ზაფხულს "აიაქსი" დატოვა. როგორ ფიქრობ, მას "იუნაიტედის" ნახევარდაცვის პრობლემის გადაჭრა შეუძლია?დეილი "აიაქსში" 8 წლის ასაკში მოვიდა. მაშინ მამამისთან ერთად ვთამაშობდი, რომელმაც ჩვენი გუნდი კაპიტნის სამკლაურით გამარჯვებამდე მიიყვანა. დაუჯერებელია მისი შვილის, დეილის ზრდისა და პროფესიონალად ჩამოყალიბების ხილვა.
თავიდან მარცხენა მცველის პოზიციაზე დაიწყო, მაგრამ მოგვიანებით ჩამშლელი ნახევარმცველი გახდა. დარწმუნებული ვარ, იგი "იუნაიტედის" ნახევარდაცვაში დიდ ხანს დარჩება.
რას იტყვი დავიდ დე ხეას წარმატებაზე? შეიძლება მას შენი ღირსეული მემკვიდრე უწოდო?(იცინის). შეგიძლიათ ასეც თქვათ. მინდა, რომ მას მუდამ ჩემ მემკვირდედ მოიხსენიებდნენ. დავიდს ყველაფერი აქვს მაღალი კლასის მეკარედ გახდომისთვის, თუმცა ჯერ კიდევ ახალგაზრდაა. დარწმუნებული ვარ, ლუი ვან გაალთან და ფრანს ჰუკთან ერთად გაცილებით უკეთესი გახდება.
ბლიც-კითხვები. მზად ხარ?დიახ.
საუკეთესო ფეხბრთელი, რომელთან ერთად გითამაშია.კრიშტიანუ რონალდუ.
საუკეთესო თავდამსხმელი, რომლის წინააღმდეგ გითამაშია.რომარიო.
სერ ალექს ფერგიუსონი, თუ ლუი ვან გაალი?ლუი ვან გაალი.
ჩემპიონთა ლიგაზე გამარჯვება - "აიაქსთან" თუ "იუნაიტედთან" ერთად?მმმ... ეს რთულია, "იუნაიტედთან" ერთად.
საუკეთესო სეივიმე ვიტყოდი ყველაზე მნიშვნელოვანი - ანელკას დარტყმა.
ყველაზე ცუდი გაშვებული გოლიასეთი ბევრი იყო (იცინის). ვერ ვიხსენებ.
კარიერის ყველაზე დიდი სინანულინაკრებთან ერთად ღირებული ტიტულის მოგება ვერ მოვახერხე.
კარიერის საუკეთესო მომენტი"იუნაიტედთან" ერთად ჩემპიონთა ლიგაზე გამარჯვება - უკანასკნელი პენალტის აღება. ეს ოცნება იყო!
წყარო:
carrick.ru