ფილ ჯონსი დარწმუნებულია, რომ "მანჩესტერ იუნაიტედის" დადგამს ნამდვილ შოუს კვირას გასამართ მატჩში და ყველას დაუმტკიცებს, რომ პირველადგილოსანი "ჩელსიის" დამარცხება შესაძლებელია.

MUTV-სთან საუბარში ჯონსმა აღიარა, რომ ჟოზე მაურინიოს გაწვრთნილი გუნდი ნამდვილად შესანიშნავად გამოიყურება. თუმცა ინგლისელი მცველი დარწმუნებულია, რომ ისეთი ფეხბურთელებით, როგორიც რადამელ ფალკაო და ანხელ დი მარია არიან, მათ შეუძლიათ "ჩელსისთვის" დიდი პრობლემების შექმნა.

"ედენ აზარი და დიეგო კოშტა ნამდვილად წარმოადგენენ საშიშროებას, ისინი მაღალი დონის ფეხბურთელები არიან." - განაცხადა ჯონსმა. "თუ "ჩელსის" შემადგენლობას გადახედავთ უამრავ ასეთ მაღალი დონის ფეხბურთელს იპოვით, თუმცა იგივეს თქმა შემიძლია ჩვენზე."

როცა ჯონსს დი მარიაზე ჰკითხეს, მან უპასუხა: "დი მარია საუკეთესოთა შორისაა, ის ფანტასტიური ფეხბურთელია."

"ის ჩუმი ადამიანია, გასახდელშიც და მოედანზე ჩუმად აკეთებს თავის საქმეს. თუმცა მას ყველაფერი აქვს - ტექნიკა, სისწრაფე, ცოდნა, მას შეუძლია გოლების გატანა და ამას თქვენ ყველა თამაშში შეამჩნევთ, მისი დარტყმული ბურთები ყოველთვის ხიფათს წარმოქმნის და მისი განეიტრალება ყოველთვის რთულია. ანხელი სწორედ ისაა ვინც გვჭირდება."

მიუხედავად იმისა, რომ "ჩელსის" მიმდინარე სეზონში ყველაზე მეტი გოლი (23) აქვს გატანილი, ფილი დარწმუნებულია, რომ თამაშის განმავლობაში "იუნაიტედი" დიდ დროს გაატარებს შეტევაში, "ჩელსი" კი წაუგებელი სერიის გაგრძელებას შეეცდება. როგორც მოგეხსენებათ, ბოლო მატჩი ამ ორი გუნდის მონაწილეობით "ოლდ ტრაფორდზე" უგოლოდ დამთავრდა, მიუხედავად "იუნაიტედის" დიდი მცდელობისა.

"ისინი აღმართავენ ძლიერ დაცვას და ალბათ იტყვიან 'მოდით და დაშალეთ თუ შეძლებთ'" -გააგრძელა ჯონსმა. "ჩვენ რაიმე გზა უნდა ვიპოვოთ ამის გასაკეთებლად. ვფიქრობ, ჩვენ მათ უნდა ვანახოთ რისი გაკეთება შეგვიძლია. მნიშვნელოვანია, რომ ბოლომდე წარმოვაჩინოთ საკუთარი თავები და არ შეგვეშინდეს "ჩელსის" წინააღმდეგ თამაშის. დიახ, მათ კარგი გუნდი ჰყავთ, თუმცა არა დაუმარცხებელი."

ჯონსი ასევე აღიარებს, რომ აუცილებელია "ჩელსისთან" 10 ქულიანი სხვაობის შემცირება. "რა თქმა უნდა გვსურს სამი ქულის აღება, განსაკუთრებით საშინაო მატჩში. ჩვენ ეს გასულ ტურშიც უნდა გვექნა, თუმცა ვერ მოვახერხეთ, ამიტომ კვირის მატჩი კიდევ უფრო მნიშვნელოვანია."

ორშაბათს გამართულ მატჩში, ფილ ჯონსი ერთ თვიანი შესვენების შემდეგ პირველად გამოვიდა მოედანზე. მიუხედავად არასასურველი შედეგისა, ჯონსი კმაყოფილია, რომ მოახერხა მოედანზე დაბრუნება.

"ვესტ ბრომვიჩის" წინააღმდეგ მატჩი საკმაოდ რთული გამოდგა. ისინი ძალიან ორგანიზებულად მოქმედებდნენ და პირველი 15 წუთი გაგვიჭირდა მათთან გამკლავება, თუმცა შემდეგ მოვახერხეთ ჩვენი თამაშის პოვნდა და უამრავი მომენტი შევქმენით. ამ ყველაფრის გათვალისწინებით, ვფიქრობ უნდა მოგვეგო, თუმცა ეს ასე არ მოხდა."

"ძალიან იმედგაცრუებული ვიყავი ჩემი ტრავმის გამო, თუმცა ბიჭებს მაინც მთელი გულით ვგულშემატკივრობდი ამ დროის განმავლობაში. მე თვალს ვადევნებდი თამაშებს და გასახდელშიც გუნდთან ერთად ვიყავი. მოხარული ვარ, რომ მოვახერხე დაბრუნება. ახლა თავს კარგად ვგრძნობ და მზად ვარ მომავალი მატჩებისთვის."

წყარო: ManUtd.com