დავიდ დე ხეას მიაჩნია, რომ ის თავისი კარიერის საუკეთესო თამაშს აჩვენებს და "მანჩესერ იუნაიტედში" სამი წლის წინ მოსვლის შემდეგ ძლიერ განვითარდა.

ესპანელმა "ევერტონთან" მოპოვებულ გამარჯვებაში დიდი წვლილი შეიტანა, რამეთუ ბეინსის, ოვიედოსა და ოსმანის დარტყმების შედეგად "იუნაიტედი" გარდაუვალი გოლისგან იხსნა.

23 წლის კიპერი საბოლოოდ შეხვედრის საუკეთესო ფეხბურთელად დასახელდა, თუმცა მიიჩნევს, რომ ეს მისი საბოლოო ეტაპი არ არის და წინ უფრო დიდი გზა აქვს.

"ვფიქრობ ჩემ კარიერაში საუკეთესო ფეხბურთს ვაჩვენებ. აქ სამი წლის განმავლობაში ვიმყოფები და თავიდან ძალიან გამიჭირდა. ახლა კი ყველაფრისთვის მზად ვარ."

2011 წელს "ატლეტიკო მადრიდიდან" დე ხეა თითქმის ორჯერ უფროსი მეკარის, ედვინ ვან დერ საარის შემცვლელად "იუნაიტედში" გადავიდა. 20 წლის მეკარე უამრავ შეცდომას უშვებდა თავიდან, რის გამოც მისი მისამართით უამრავი მაკრიტიკებელი სიტყვა ისმოდა.

"საწყისი ეტაპის გამოცდილება დამეხმარა ისეთ ადამიანად და ფეხბურთელად ჩამოყალიბებაში, როგორიც ახლა ვარ. როცა ცუდ პერიოდში ხარ, უნდა გაუმჯობესდე. უნდა გაძლიერდე, რათა ამ ყველაფერს თავი გაართვა და მჯერა, რომ მე გავძლიერდი. ახლა გაცილებით უკეთესი მეკარე ვარ."

"ადრეული პერიოდი ჩემთვის და ჩემი ოჯახისთვის ძალიან რთული გამოდგა. თუმცა, ეს ნორმალურია, როცა ცუდად თამაშობ ისეთ დიდ კლუბში, როგორიც "მანჩესტერ იუნაიტედია". მიხარია, რომ ასე მოხდა, რადგან კრიტიკა გარკვეულწილად გეხმარება კიდეც. მეკარეობა რთული საქმეა და შეცდომებს აუცილებლად უშვებ. ეს ნორმალურია. მაგრამ გონებრივად უნდა გაძლიერდე და უნდა ფიქრობდე, რომ ყველაფრის გაუმჯობესება შეიძლება."

"ევერტონთან" დე ხეას თამაში ერთ-ერთ საუკეთესო გამოსვლად იქნა მიჩნეული:

"მსგავსი თამაშები შენი თავდაჯერებულობის ზრდას ეხმარება. ეს ერთ-ერთი საუკეთესო თამაშია "მანჩესტერ იუნაიტედში" ჩემი კარიერის პერიოდში. ამის გამო ძალიან ბედნიერი ვარ."

"მატჩის შემდგომ ტიმ ჰოვარდი მოვიდა ჩემთან და მითხრა, რომ ფანტასტიურად ვითამაშე. თამაში მე არ მომიგია. ეს გუნდმა გააკეთა. ჩვენ გავიტანეთ და შესანიშნავად დავიცავით თავი. ეს კი გუნდის დამსახურებაა და არა მხოლოდ ჩემი."

წყარო: manutd.com