შაბათს გამართულ შეხვედრაში, რომელშიც "მანჩესტერ იუნაიტედი" "ვესტ ჰემს" "ოლდ ტრაფორდზე" დაუპირისპირდა სადებიუტო მატჩი ჩაატარა 19 წლის პედი მაკნეირმა. ახალგაზრდა ფეხბურთელის დებიუტის მიზეზი "იუნაიტედის" დაცვის ხაზში არსებული პრობლემები გახლდათ, რომელიც ჯონი ევანსის, ფილ ჯონსის, კრის სმოლინგის ტრავმებითა და ტაილერ ბლეკეტის დისკვალიფიკაციით იქნა გამოწვეული.
მეორე ტაიმში "ვესტ ჰემის" მარჯვენა მცველმა, კარლ ჯენკინსომა ერთ-ერთი ყველაზე სახიფათო ჩაწოდება განახორციელა დე ხეას კარის მიმართულებით, თუმცა სიტუაცია ფანტასტიური თავურის წყალობით სწორედ 19 წლის მაკნეირმა განმუხტა.
"ძალიან კარგად ითამაშა. თამაშამდე ასეთი შესრულების ჩვენებას წარმოვიდგენდი, რადგან ძალიან კარგი ფეხბურთელია. ასეთი ფეხბურთელების უმრავლესობას კარგი დებიუტი აქვთ. ძალიან მიხარია, რომ მოვიგეთ და ეს მეტწილად მისი დამსახურებაცაა, რადგან მეორე ტაიმში მის მიერ თავით თამაში ფანტასტიური გახლდათ. ის ფეხითაც კარგად თამაშობდა" - განაცხადა "იუნაიტედის" მთავარმა მწვრთნელმა, ლუი ვან გაალმა.
ახალგაზრდა ფეხბურთელის თამაშს რობინ ვან პერსიც გამოეხმაურა:
"პედი დიდებული იყო. ვიცი, რამდენად რთულია ასეთ მატჩებში სადებიუტო შეხვედრის ჩატარება. ჩემი დებიუტი ჰოლანდიაში "ფეიენოორდის" რიგებში მქონდა, მას კი 75 ათასი მაყურებლის წინაშე "მანჩესტერ იუნაიტედში", თანაც რთულ პერიოდში. ბურთით ძალიან კარგად თამაშობდა. მისი გადაწყვეტილებები დიდებული იყო და დაცვის ხაზშიც კარგად გამოიყურებოდა."
თბილი სიტყვების გარეშე არ დარჩენია "იუნაიტედის" მარჯვენა მცველი, რაფაელიც:
"შესანიშნავად ითამაშა, ფანტასტიური ფეხბურთი ითამაშა და მის გამო ყველა გახარებულია. მან მუშაობა უნდა განაგრძოს, რადგან უდიდესი მომავალი აქვს."