"ჩელსის" მცველის, ჯონ ტერის კრიტიკის შემდეგ რიო ფერდინანდმა მომდევნო ობიექტად "მანჩესტერ იუნაიტედის" ყოფილი მთავარი მწვრთნელი, დევიდ მოიესი აირჩია.
The Sun რიო ფერდინანდის ავტობიოგრაფიული წიგნის ნაწილის გავრცელებას აგრძელებს. გუშინ გავრცელდა რიოს წიგნის ნაწილი, რომელშიც იგი ტერის "იდიოტს" უწოდებს. დღევანდელ ნაწილში კი ფერდინანდის მომდევნო "მსხვერპლი" დევიდ მოიესია. "მოიესის თითოეულმა ინოვაციამ ძირითადად ნეგატივი და გაურკვევლობა გააჩინა. მთავარი გაურკვევლობა მდგომარეობდა ბურთის წინ გადაწოდებაში. ხშირად გვეუბნებოდა, რომ გრძელი პასებით გვეთამაშა. ხანდახან მოთამაშეებს ეჩვენებოდათ, რომ თავის კარიერაში ასე ხშირად ბურთი არასდროს გადაუგდიათ წინ."
"ჩვენი მთავარი ტაქტიკა იყო გრძელი, მაღალი, დიაგონალური ჩაწოდება. "ფულემთან" გამართულ საშინაო შეხვედრაში 81 ჩაწოდება განვახორციელეთ. ვერაფრით ვხვდებოდი ამას რატომ ვაკეთებდით. ჩვენ გუნდში ხომ ენდი კეროლი არ თამაშობდა."
"მთელი მისი მიდგომა სხვაგვარი იყო. მოიესს ბევრი პასის კეთებაც სურდა. გვეუბნებოდა: "მინდა, რომ დღეს 600 გადაცემა გავაკეთოთ, წინა კვირაში მხოლოდ 400 იყო." რა აზრი აქვს. მე 5 გოლის 10 პასით გატანა მირჩევნია."
ფერდინანდის წყენის მთავარი მიზეზი ის გახლავთ, რომ მოიესმა რიო ჩემპიონთა ლიგის პლეი-ოფის შეხვედრაში "ბაიერნთან" განაცხადში არ შეიყვანა.
"ამან ბოლო მომიღო. შინაგანად მსურდა მეყვირა და მოიესს მივვარდნოდი. მე გუნდური მოთამაშე ვარ, ამიტომაც მოვკეტე და საკუთარ ადგილზე დავრჩი. ალბათ ეს ყველაზე ცუდი დრო იყო, რაც "იუნაიტედში" მქონია. ჯერ არასდროს დავუტოვებივარ ვინმეს ასეთი მნიშვნელოვანი შეხვედრის მიღმა - მოიესმა კი ეს ყველას თვალწინ გააკეთა."