"ევერტონის" მთავარმა მწვრთნელმა, რობერტო მარტინესმა განაცხადა, რომ "მანჩესტერ იუნაიტედი" მის კლუბში ჩემპიონთა ლიგის საგზურის მოპოვებისთვის ძლიერ კონკურენტს ხედავს, რის გამოც ტომ ქლევერლის "გუდისონ პარკზე" გადასვლის ნება არ მისცეს.
სატრანსფერო ფანჯრის დახურვამდე მარტინესი ტომ ლქევერლის იჯარით აყვანას გეგმავდა, მაგრამ "იუნაიტედმა" "კანფეტებს" განუცხადა, რომ ფეხბურთელის გაყიდვას აპირებდნენ. ამიტომაც მარტინესი გაოცებული დარჩა, როცა გაიგო, რომ ქლევერლი იჯარის წესით "ასტონ ვილაში" გადავიდა.
"ასეთ გადაწყვეტილებებს კლუბი იღებს, რომელიც მოთამაშეს ფლობს. იქნებ მათ უბრალოდ არ მოინდომეს ფეხბურთელის იჯარით გაშვება ისეთ კლუბში, რომელიც კონკურენტია და რომელმა წინა წელი სატურნირო ცხრილში მათზე მაღლა დაასრულა. არ ვიცი."
"გასული სეზონის სატურნირო ცხრილს ჩახედეთ - ჩვენ მეხუთე ვიყავით, ისინი კი ცოტა ქვეთ, ასე რომ, ამ მხრივ უნდა გავუგოთ. ამავდროულად "ასტონ ვილამ" დიდებულად დაიწყო ახალი სეზონი. ფაბიან დელფის თამაშს შეხედეთ, პლუს კრისტიან ბენტეკე უბრუნდებათ - ისინი ძლიერები იქნებიან. მაგრამ ამის კომენტირება არ შეგვიძლია, "იუნაიტედის" გადაწყვეტილება ასეთია. ჩვენი ინფორმაციით, ფეხბურთელი იჯარის წესით ჩვენთვის მიუწვდომელი იყო და წერტილი დაესვა ამას."