მშვიდად ყოფნის 5 მიზეზი

ვან გალი

ვან გალის სახით ,,იუნაიტედს'' მსოფლიოს ერთ–ერთი საუკეთესო მწვრთნელი ჰყავს, რომელმაც თავის ყოფილ გუნდებში უამრავ წარმატებას მიაღწია: მოგებული ჩემპიონთა ლიგა ახალგაზრდულ ,,აიაქსთან'' ერთად და თითქმის შესრულებული ,,ტრებლი'' ,,ბაიერნთან'' ერთად, რომელსაც ხელი ჟოზე მოურინიოს ,,ინტერმა'' შეუშალა ( 2009–10 სეზონის ჩემპიონთა ლიგის ფინალში ,,ბაიერნი'' 2–0 დამარცხდა ,,ინტერთან"). 2014 წლის მსოფლიო ჩემპიონატი, სადაც სრულიად უიმედო ჰოლანდიის ნაკრებმა ყველა გააკვირვა და მე–3 ადგილი დაიკავა. ყველა ეს არგუმენტი ჯიუტად მიუთითებს იმაზე, რომ 63 წლის ჰოლანდიელ სპეციალისტს ,,იუნაიტედში'' წარმატებული კარიერა ელოდება.

,,ვან გალის დრო''

5 ქულის დაკარგვა 2 მატჩში არც ისე კარგი შედეგია გუნდისთვის, რომლის მიზანიც ჩემპიონთა ლიგის ზონაში მოხვედრაა. მაგრამ ისტორია ამბობს, რომ ვან გალის გუნდებს მუდამ სჭირდებოდათ გარკვეული დრო, რომლის შემდეგაც ისინი დიდ წარმატებებს აღწევდნენ.

1998–99 წლების სეზონში ,,ბარსელონა'' 14 თამაშის შემდეგ მე–10 ადგილს იკავებდა, საბოლოოდ კი ისინი პრიმერას ჩემპიონები გახდნენ. 2009–10 სეზონში კი მე–7 ადგილს იკავებდა ,,ბაიერნი'' 13 თამაშის შემდეგ, მაგრამ სეზონის ბოლოს მაინც ,,მიუნხენელებმა'' იზეიმეს ჩემპიონობა.

უიღბლობა ტრავმებთან

,,სანდერლენდთან'' გამართულ მატჩში კრის სმოლინგი დაიმტვრა, რომელმაც ,,იუნაიტედის'' ტრავმიროვანთა სია 8–მდე გაზარდა, ,,მილტონ დონსთან'' კი კაგავა, რომელმაც ტრავმიროვანთა რიცხვს კიდე ერთი დაუმატა და 9–მდე აიყვანა. 4 მთავარი ცენტრალური ნახევარმცველი მიუწვდომელია, მაგრამ როდესაც ლაზარეთი მთლიანად დაცარიელდება, ჰოლანდიელს ექნება საშუალება მიმართოს როტაციებს. ერერასა და კერიკის დაბრუნება მხოლოდ დადებითად უნდა აისახოს ,,იუნაიტედის'' თამაშზე.

ანხელ დი მარია

ინგლისის ჩემპიონატის ყველაზე ძვირადღირებული ფეხბურთელი ვან გალის მთავარ კოზირად უნდა იქცეს. მისი დებიუტი სავარაუდოდ შაბათს უნდა შედგეს ,,ბარნლისთან'' მატჩში, სადაც ,,იუნაიტედს'' მხოლოდ გამარჯვება დააკმაყოფილებს. დი მარია უმაღლესი კლასის ფეხბურთელია, რომელსაც უამრავი მომენტის შექმნა შეუძლია. მისმა მოსვლამ მხოლოდ დადებითი ზეგავლენა უნდა მოახდინოს ფეხბურთელებზე.

დარჩენილი დრო სატრანსფერო ფანჯრის დახურვამდე

დარჩენილ 3 დღეში ვან გალი აუცილებლად შეეცდება ცენტრალური მცველისა და ნახევარმცველის შეძენას. თუ ის შეძლებს ვიდალის, ბლინდის და დე იონგის სამეულიდან ერთ–ერთის შეძენას, ,,იუნაიტედს'' პრობლემები საბოლოოდ მოეხსნება.

მღელვარების 5 მიზეზი

პრემიერ ლიგას ლოდინი არ უყვარს

ვან გალმა დასაწყისშივე გააფრთხილა ყველა, რომ იდეალური გუნდის მისაღებად მას სამი თვე სჭირდება. მაგრამ ნაჩვენები თამაშიდან გამომდინარე დიდია იმის ალბათობა, რომ უფრო მეტი დროც გახდეს საჭირო.

მარტივი კალენდარი თითქოს აძლევდა ,,იუნაიტედს'' იმის საშუალებას, რომ თავიდანვე ქულათა მაქსიმუმი დაეგროვებინა, მაგრამ ქულები უკვე დაიკარგა და მეტის დაკარგვის უფლება ''წითელ ეშმაკებს'' აღარ აქვთ.


მუშაობს კი 3–5–2 სქემა ?

დაფიქრებაც არ სჭირდება, ისე შეიძლება გაეცეს ამ კითხვას პასუხი : არა ! 1 ქულა, 2 გატანილი და 7 მიღებული, 1 ფრე და 2 წაგება – ასეთია ვან გალის ახალი სათამაშო სქემის ამჟამინდელი შედეგი.

,,სანდერლენდთან'' მატჩში ფორვარდებამდე ბურთი საერთოდ ვერ აღწევდა, რის გამოც რუნი და პერსი იძულებულნი იყვნენ უკან დაეხიათ.

დი მარიას მოსვლამ ყველა ამ პრობლემას წერტილი უნდა დაუსვას. 4–3–3 სქემა იდეალური იქნება არგენტინელისათვის, რომელიც დიდი ალბათობით იმავე პოზიციაზე მოგვევლინება, რა პოზიციაზეც ჰოლანდიელი რობენს იყენებდა ,,ბაიერნში'' ყოფნის პერიოდში.

ყველაფერი შესაძლებელია ისეც დამთავრდეს, თითქოს არც დაწყებულა

ვან გალის 3 თვიანი ადაპტაცია ნოემბრის დასაწყისში მთავრდება, მაშინ როცა გუნდი აუცილებლად უნდა ათამაშდეს. მაგრამ თუ ასეთი შედეგები კვლავ გაგრძელდება, ოქტომბრის თვეში გუნდი უკვე ძლიერ იქნება დაშორებული თავისი კონკურენტებისგან. უკვე ზედიზედ მეორედ ვერ მოხვედრა ჩემპიონთა ლიგაზე კი გუნდს კატასტროფულ შედეგებს მოუტანს.

ყოფნით კი მოთამაშეებს და გულშემატკივრებს რწმენა ?

ფაქტია ჩატარებული 3 თამაშის შემდეგ საკუთარ შესაძლებლობებში ფეხბურთელებს ეჭვი შეეპარებოდათ. რა თქმა უნდა ვან გალს უფრო მეტი ავტორიტეტი აქვს, ვიდრე დევიდ მოიესს, მაგრამ მას სასწრაფოდ სჭირდება პირველი გამარჯვება, რათა ფეხბურთელებს რწმენა დაუბრუნოს.

შემადგენლობა

ეს ჰოლანდიელის ალბათ ყველაზე დიდი თავსატეხია. თუ როგორი არასრულყოფილი გუნდი დატოვა ფერგიუსონმა, ეს მოიესის დროს არაჩვეულებრივად გამოჩნდა. სერ ალექსი უდიდესი მწვრთნელია, მაგრამ ნათელია, რომ მის მიერ დატოვებულ შემადგენლობაში უამრავი პრობლემაა.

მოიესს დარჩა გუნდი, რომელსაც სამი ძალზედ ასაკიანი მცველი ჰყავდა. შემადგენლობაში არ იყო მაღალი კლასის ცენტრალური ნახევარმცველი, ვინგერებზეც რაიმე დაყრდნობა ძნელი იყო. ვან პერსი მთელი წელი ტრავმიანობდა, რუნი კი იძულებული ხდებოდა უკან დახეულიყო და ცენტრში ეთამაშა.

როგორც არ უნდა დასრულდეს ,,ბარნლისთან'' მატჩი, ეს პრობლემები კვლავ დარჩება, მათ მოგვარებას დრო სჭირდება და სწორედ ამიტომაც უნდა გამოავლინოს ვან გალმა მაღალი კლასი და გუნდი რაც შეიძლება მალე დაუბრუნოს თავოს ჩვეულ პოზიციებს.