5) “ქუინს პარკ რეინჯერსის” და საფრანგეთის ერონული ნაკრების თავდამსხმელს, ლოიკ რემის ლონდონის “ტოტენჰემი” ეპატიჟება. მოგეხსენებათ, რომ “ქპრ”-ს ფორვარდი გასულ წელს “ნიუკასლში” არენდის წესით თამაშობდა. დიდი შანსია, რომ ამ ზაფხულის სატრანსფერო ფანჯარაზე ლოიკ რემიმ სამუშაო ადგილი გამოიცვალოს. მას შემდეგ, რაც ფრანგმა ფორვარდმა “ლივერპულში” სამედიცინო შემოწმება ჩააგდო, მისით ბევრი კლუბი დაინტერესდა. მიუხედავად ამისა, ფრანგი თავდამსხმელისთვის ბრძოლაში ფავორიტად “მამლები” მიიჩნევიან. “ტოტენჰემის” ხელმძღვანელები მზად არიან, რომ ლოიკ რემის სანაცვლოდ გუნდიდან მაიკლ დოუსონი და ანდროს ტაუსენდი გაუშვან. ამ უკანასკნელმა გასული სეზონის ნახევარი “ქპრ”-ში არენდის წესით გაატარა.



4) უცხოური მედიასივრცის თანახმად, სტევან იოვეტიჩი თავის ამჟამინდელ კლუბს დატოვებს. ეს ინფორმაცია “მანჩესტერ სიტის” ამერიკული ტურნეს შემდეგ დადასტურდა. მანუელ პელეგრინიმ უკვე განაცხადა, რომ თავისი კლუბი ფინანსური Fair Plays დასაცავად გუნდიდან რამოდენიმე ფეხბურთელს გაუშვებს. იოვეტიჩი კი იმ ფეხბურთელთა სიაში შედის, რომლებიც მიმდინარე ზაფხულის სატრანსფერო ფანჯარაზე “მანჩესტერ სიტის” დატოვებენ. ჩერნოგორიელი თავდამსხმელის გადაბირებას იტალიური “რომა” შეეცდება. დედაქალაქური კლუბი მატია დესტროსა და ადამ ლიაიჩის გაყიდვით საკმაოდ სერიოზულ თანხას გამოიმუშავებს, რითიც სტევან იოვეტიჩის ყიდვას შეეცდება. სტევან იოვეტიჩის სატრანსფერო ღირებულება 30 მილიონ ევროს შეადგენს. შეგახსენებთ, რომ 1 წლის წინ ჩერნოგორიელი თავდამსხმელი “მანჩესტერ სიტიში” “ფიორენტინადან” 26 მილიონი ევროს სანაცვლოდ გადავიდა.



3) ახალი აბავი არ არის, რომ რაფაელ ბენიტესის გუნდი მიმდინარე ზაფხულის სატრანსფერო ფანჯარაზე საყრდენი ნახევარმცველის ძიებაშია. ნეაპოლიკანელთა ინტერესთა სფეროში უამრავი ფეხბურთელი შედის. მიუხედავად ამისა, უცხოური მედიასივრცე იტყობინება, რომ “ნაპოლის” ხელმძღვანელების მთავარი სამიზნე “ვილიარეალის” და ჰოლანდიის ეროვნული ნაკრების ჰავბეკი, დე გუზმანია. აღსანიშნავია, რომ გასული ორი სეზონი დე გუზმანმა “სუონსიში” არენდის წესით გაატარა. გასულ წელს ჰოლანდიელმა ნახევარმცველმა პრემიერ-ლიგის ეგიდით 34 მატჩი ჩაატარა და 4 გოლის გატანა მოახერხა. დე გუზმანმა ბრაზილიაში გამართულ მსოფლიოს ჩენმპიონატზეც იასპარეზა. მან ჰოლანდიის ეროვნული ნაკრების რიგებში ავსტრალიის, ესპანეთის და ბრაზილიის წინააღმდეგ ითამაშა. შეგახსენებთ, რომ დე გუზმანის სატრანსფერო ღირებულება 8,75 მილიონ ევრომდე გაიზარდა და მის გადაბირებას “ნაპოლის” გარდა “ქუინს პარკ რეინეჯრსიც” ცდილობს.



2) ესპანეთის ჩემპიონები “ტორინოს” შემტევი ნახევარმცველისთვის ბრძოლაში ჩაერთვნენ. მოგეხსენებათ, რომ ალესიო ჩერჩი “მილანის” მთავარი სატრანსფერო მიზანია, თუმცა ტურინელებს “როსონერისგან” ჩერჩის სანაცვლოდ ჯერჯერობით არანაირი შეთავაზება არ მიუღიათ. “ტორინო” მზად არის, რომ ალესიო ჩერჩის 18 მილიონი ევროს სანაცვლოდ შეელიოს, თუმცა მადრიდელები იტალიელი ნახევარმცველის სანაცვლოდ აღნიშნული თანხის გადახდას არ აპირებენ. უცხოური მედიასივრცის თანახმად, მადრიდის “ატლეტიკოს” ხელმძღვანელები მზად არიან, რომ “ტორინოს” იტალიელი შემტევი ნახევარმცველის სანაცვლოდ 13-იდან 16 მილიონ ევრომდე გადაიხადონ. ცნობისთვის, გასულ სეზონში 27 წლის ჩერჩიმ სერია ა-ს ეგიდით 37 მატჩი ჩაატარა და თავის გუნდს ევროპის ლიგის ზონაში მოსახვედრად 13 გატანილი გოლის გატანით დაეხმარა.



1) ლისაბონის “სპორტინგის” არგენტინელმა განაპირა მცველმა, მარკოს როხომ ბრაზილიაში გამართულ მუნდიალზე თავისი კარგი თამაშით უამრავი ტოპ-კლუბის ყურადღება მიიპყრო. მოსკოვის “სპარტაკის” ყოფილ განაპირა მცველს აქტიურად უკავშირებენ მერსისაიდულ “ლივერპულს” და “მანჩესტერ იუნაიტედს”. უცხოური გამოცემები როხოსთვის ბრძოლაში ფავორიტად “წითელ ეშმაკებს” მიიჩნევენ. მოგეხსენებათ, რომ მარკოს როხო 2014 წლის მსოფლიოს ჩემპიონატზე არგენტინის ეროვნული ნაკრების ძირითადი შემადგენლობის უცვლელი წევრი იყო. მისმა ნაკრებმა მუნდიალზე ფინალში გასვლა მოახერხა, თუმცა საბოლოოდ ვერცხლს დასჯერდა. ბრიტანული პრესის ინფორმაციით, “მანჩესტერ იუნაიტედის” ხელმძღვანელები მზად არიან, რომ როხოს სანაცვლოდ 15 მილიონი ფუნტი გადაიხადონ. მიუხედავად ამისა, რამოდენიმე გავლენიანი გამოცემა იტყობინება, რომ ლუის ვან გაალის გუნდის მთავარი სატრანსფერო მიზანი ანხელ დი მარიაა. “წითელი ეშმაკები” ჯერ ანხელ დი მარიას ყიდვას შეეცდებიან, ხოლო შემდეგ კი მარკოს როხოს ტრანსფერზე გადაერთვებიან.